«Հայկական կինո 1924-2023» երկլեզու կատալոգի շնորհանդես. հայ կինոյի 100-ամյա արտադրանքը՝ մեկ գրքում
ՄշակույթՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Երևանի «Ոսկե ծիրան» 21-րդ միջազգային կինոփառատոնի շրջանակում կայացել է «Հայկական կինո 1924-2023» երկլեզու կատալոգի շնորհանդեսը:
ԿԳՄՍՆ-ից հայտնում են, որ Կատալոգը հրատարակվել է ՀՀ կրթության, գիտության, մշակույթի և սպորտի նախարարության աջակցությամբ՝ «Հայ կինո-100» հոբելյանական միջոցառումների շրջանակում: Իրականացնողը Հայաստանի կինոգետների և կինոլրագրողների ասոցիացիան է:
Հրատարակությունը ներկայացնում է հայ կինոյի 100-ամյա արտադրանքի լիակատար պատկերը մեկ գրքում` ընդգրկելով Հայաստանում կամ ՀՀ-ի հետ համատեղ արտադրված խաղարկային, վավերագրական և անիմացիոն ֆիլմերի մասին սպառիչ տեղեկատվություն:
Կատալոգի համար աղբյուր է հանդիսացել Հայաստանի ազգային կինոկենտրոնի, «Հայկ» վավերագրական ստուդիայի, Հանրային հեռուստատեսության, ինչպես նաև հայկական անկախ կինոարտադրողների և կինոստուդիաների տրամադրած տեղեկատվությունը:
Ֆիլմերը խմբավորված են ըստ տեսակների (խաղարկային, վավերագրական, անիմացիոն) և արտադրության տարիների՝ այբբենական կարգով: Կատալոգում ընդգրկված են ֆիլմերի հետևյալ տվյալները՝ անվանումը, արտադրող ստուդիան, տեսակը (նշված է բաժնի խորագրում), ժանրը (եթե նշվել է արտադրողի կողմից), տևողությունը` րոպեներով, մետրաժը (ժապավենային ֆիլմերի դեպքում) և մի շարք այլ տեխնիկական տեղեկություններ, ինչպես նաև նկարահանող խմբի կազմը, դերասանների ու նրանց մարմնավորած դերերի անունները և համառոտ ծանոթագրությունը բովանդակության մասին (անոտացիան): Կատալոգն ունի նաև ֆիլմերի անվանումների այբբենական ցանկ:
Հայկական կինոյի կատալոգի առաջին փորձն արվել է 60-ականների սկզբին հայ կինոյի հիմնադիրներից մեկի` Դանիել Դզնունու կողմից: Այն տարիներին նա կազմել էր նախորդ 35 տարվա արտադրանքի հիմնականում հավաստի ֆիլմացանկը, ինչպես նաև հայ կինոյին վերաբերող գրքերի և հոդվածների մատենագիտությունը:
«Հայկական կինո» կատալոգի առաջին եռալեզու (հայերեն-անգլերեն-ռուսերեն) հրատարակությունը լույս է տեսել 2000 թ.-ին Հայաստանի կինոգետների և կինոլրագրողների ասոցիացիայի նախաձեռնությամբ և ներառում էր 1924-1999 թթ. նկարահանված հայկական ֆիլմերը: «Հայկական կինո» կատալոգի երկրորդ հրատարակությունը, որը լույս է տեսել 2009 թ.-ին «Ոսկե ծիրան» կինոյի զարգացման հիմնադրամի և ՀՀ մշակույթի նախարարության աջակցությամբ, համալրված էր 2000-2008 թթ. նկարահանված հայկական ֆիլմերով: Այս նոր՝ լրամշակված երկլեզու (հայերեն-անգլերեն) հրատարակությունն ընդգրկում է առավել լիակատար տեղեկատվություն 1924-2022 թթ․ և մասամբ 2023 թ․ Հայաստանի կինոարտադրության մասին:
Նախորդ երկու հրատարակության նախաբանի հեղինակն էր կինոգետ, պրոֆեսոր Սուրեն Հասմիկյանը: Ի նշանավորումն հայկական կինոյում մեծ վաստակ ունեցած կինոգետի՝ կազմողները վերահրատարակել են Սուրեն Հասմիկյանի նախաբանը, որում հայկական կինոյի ուղին, զարգացման հիմնական փուլերն իմաստավորելու փորձ է արված: