Իրանը Ռուսաստանից շատ շուտով կստանա հակաօդային պաշտպանության հզոր և արդիական համակարգեր

Արման Մելիքյանը ֆեյսբուքյան իր էջում գրում է․

Իրանը նպատակահարմար չգտավ համաձայնել նավթի արդյունահանման ծավալների աճը սանձելու այն համատեղ առաջարկին, որը հավանության էր արժանացել նավթարդյունահանող չորս պետությունների՝ Ռուսաստանի, Սաուդյան Արաբիայի, Վենեսուելայի և Կատարի պաշտոնական ներկայացուցիչների հանդիպման ժամանակ: Պաշտոնական Թեհրանի պահվածքը, փաստորեն, նպաստելու է նավթի գների հետագա անկմանը և, այս առումով, հակասում է Ռուսաստանի շահերին:

Միաժամանակ տեղեկատվություն տարածվեց այն մասին, որ Իրանը Ռուսաստանից շատ շուտով կստանա հակաօդային պաշտպանության հզոր և արդիական համակարգեր, ինչպես նաև ժամանակակից ռազմական ինքնաթիռներ: Այս սպառազինությունները կարող են կարևոր դերակատարում ունենալ, եթե սիրիական ճգնաժամի խաղաղ կարգավորմանն ուղղված ջանքերն անարդյունք լինեն ու երկար սպասված և վերջերս բանակցությունների սեղանի շուրջ զինադադարի հաստատման վերաբերյալ ձեռք բերված պայմանավորվածությունն իրականություն չդառնա:

Իրադարձությունների այսօրինակ զարգացումը կարող է հանգեցնել անգամ Իրանի և Սաուդյան Արաբիայի զինված ուժերի միջև բախումների՝ ինչպես Սիրիայում, այնպես էլ՝ Իրաքի տարածքում, ինչի հետևանքով, հավանաբար, կխախտվի նաև Պարսից ծոցի շրջանում նավագնացության անվտանգության ռեժիմը և լիովին կամ մասնակիորեն կդադարի այդ գոտում արդյունահանվող նավթի արտահանումն Օրմուզի նեղուցով:

Այսինքն, իրանա-սաուդական անգամ տեղային զինված բախումների արդյունքում նավագնացության համար առաջացած սպառնալիքները վստահաբար կհանգեցնեն նավթի արդյունահանման և արտահանման զգալի նվազեցման և, որպես հետևանք, կխթանեն դրա գնի կտրուկ աճը: Գործընթացների նման զարգացումը, հավանաբար, կողջունվի մերձավորարևելյան նավթարդյունահանող երկների տնտեսական ու քաղաքական մրցակիցների կողմից, սակայն դժվար թե քաջալերվի ԱՄՆ-ի և ԵՄ պետությունների ղեկավարների կողմից: