Բելառուս նախարարը ԵԱՏՄ շրջանակներում Հայաստանի հետ տնտեսական կապերը գնահատում է արդյունավետ

Բելառուսը Եվրասիական տնտեսական միության շրջանակներում Հայաստանի հետ 2015-ին ունեցել է առևտրատնտեսական ամենալավ ցուցանիշները: Այս մասին Երևանում հայտարարեց Բելառուսի Հանրապետության անտառային տնտեսության նախարար Միխայիլ Ամելյանովիչը` նշելով, որ տարին լավն է եղել: «Մենք մի քիչ քչացրել ենք երկկողմ առևտրաշրջանառության ծավալները գումարային ռեժիմով, բայց քանակական ցուցանիշներով ունեցել ենք ծավալների աճ: Հետագայում մենք կզարգացնենք այդ հարաբերությունները, որը դրական ազդեցություն կթողնի մեր համատեղ աշխատանքի վրա»,-«Արմենպրես»-ի փոխանցմամբ`ասաց բելառուս նախարարը ՀՀ էկոնոմիկայի նախարարությունում կայացած ճեպազրույցի ժամանակ:

Էկոնոմիայի նախարար Կարեն Ճշմարիտյանն էլ նկատեց, որ չնայած երկկողմ առևտրաշրջանառության անկում է արձանագրվել, բելառուսական ապրանքների ներմուծման աճ է գրանցվել 2015-ին` 2014-ի համեմատ: «Հատկանշական է, որ անկումը Բելառուսից Հայաստան ներմուծված երրորդ երկրների ապրանքների գծով է, իսկ բելառուսական ապրանքների ներմուծումն ավելացել է 10 տոկոսով»,-ասաց նախարար Ճշմարիտյանը:

Նա հավելեց, որ Հայաստանից արտահանումները ծավալային առումով գրեթե չեն նվազել, մինչդեռ գումարային արտահայմամբ նվազում է գրանցվել:

2015 թվականին Հայաստանից Բելառուս արտահանվել է 5 միլիոն 461.8 հազար ԱՄՆ դոլարի ապրանք, Բելառուսից ներմուծվել է 33 միլիոն 787.6 հազար ԱՄՆ դոլարի բելառուսական ծագման ապրանք, 14 միլիոն 643.5 հազար ԱՄՆ դոլարի էլ այլ երկրի արտադրանք: 2014-ի համեմատ գումարային արտահայտմամբ նվազում է նկատվում արտահանման ցուցանիշում (2014-ին արտահանումը կազմել է 9 միլիոն 36.5 հազար ԱՄՆ դոլար), ինչպես նաև Բելառուսից այլ երկրների ապրանքների ներմուծման ցուցանիշում (2014-ին այդ ապրանքների ներմուծումը կազմել է 29 միլիոն 480.6 հազար ԱՄՆ դոլար) գումարային արտահայտմամբ աճ է արձանագրվել բ ելառուսական ապրանքների ներմուծման ցուցանիշում (2014-ին այդ ապրանքների ներմուծումը կազմել է 31 միլիոն 31.5 հազար ԱՄՆ դոլար):