Անկարայի ահաբեկչության գործով ձերբակալվածների թիվն ավելացել է

Թուրքիայի մայրաքաղաք Անկարայում փետրվարի 17-ին տեղի ունեցած ահաբեկչության գործով ձերբակալվածների թիվն ավելացել է՝ հասնելով 17-ի: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:

Անկարայի գլխավոր դատախազ Հարուն Քոդալաքը գործի հետ կապված հայտնել է, որ իրենք արդեն գրեթե բացահայտել են հանցագործությունը: «Մոտ ժամանակներս երկրի ղեկավարները համապատասխան հայտարարություն կանեն»,- ասել է նա:

Թուրքիայի մայրաքաղաք Անկարայում փետրվարի 17-ի երեկոյան տեղի է ունեցել ահաբեկչություն, որի հետևանքով զոհերի թիվը հասել է 28-ի, վիրավորների թիվը 61-ն է: Պայթյունը տեղի է ունեցել Թուրքիայի զինված ուժերի գլխավոր շտաբից, ցամաքային, ծովային և օդային ուժերի հրամանատարության նստավայրերից, մեջլիսից, կառավարության կենտրոնական շենքից և ներքին գործերի նախարարությունից 200 մետր հեռավորության վրա: Զինվորական անձնակազմին տեղափոխող ավտոբուսը կարմիր լույսի տակ կանգնած է եղել, երբ մեկ այլ ականապատված մեքենա է պայթել այդ վայրում:

Թուրքիայի նախագահ Ռեջեփ Թայիփ Էրդողանը և վարչապետ Ահմեթ Դավութօղլուն հայտարարել են, որ հարձակման համար պատասխանատու են Քրդական բանվորական կուսակցությունը (PKK), սիրիացի քրդերի «Ժողովրդի պաշտպանության ուժերը» (YPG) և «Ժողովրդական միություններ» կուսակցությունը (PYD): Սակայն PYD համանախագահ Սալիհ Մուսլիմը հերքել է այդ պնդումները՝ ասելով, որ Սալիհ Նեջարը, ում մեղադրում են պայթյունն իրականացնելու մեջ, իրենց անդամներից չէ: