Շարմազանովը Զուրաբյանին կոչ է անում իր քաղաքական թիմի ֆիասկոյի համար ՀՅԴ- ին չմեղադրել

Ազգային ժողովի փոխնախագահ Էդուարդ Շարմազանովը համաձայն չէ ՀԱԿ խմբակցության ղեկավար Լևոն Զուրաբյանի հայտարարության հետ, թե ՀՅԴ-ի հետ համագործակցությունը կարող է վատ հետևանքներ ունենալ ՀՀԿ-ի համար: ՀՀԿ ԳՄ նիստից հետո լրագրողների հետ հանդիպմանը Շարմազանովն ընդգծեց, որ Լևոն Զուրաբյանի մոտ խոսել է իր քաղաքական թիմի ֆիասկոն:

«Ես հիշեցնեմ, որ Լևոն Տեր-Պետրոսյանը իր քաղաքական վերադարձի ժամանակ առաջինն այցելեց Հանրապետության փողոց, որտեղ գտնվում է Դաշնակցության գլխավոր գրասենյակը: Դրանից հետո տարիներ անց նույն Տեր-Պետրոսյանը, խոսելով Դաշնակցության հետ իրենց համագործակցության մասին, վկայակոչեց և քաղաքական հրապարակ նետեց «հրաշալի քառյակ» եզրույթը: Հիմա, քանի որ իրենք ֆիասկո են ապրել թե «հրաշալի քառյակի», թե Դաշնակցության հետ համագործակցության առումով, փորձում են մեզ զգուշացնել»,- «Արմենպրես»-ի հաղորդմամբ՝ ընդգծեց Շարմազանովը:

Նա նշեց, որ ՀՅԴ-ն չէ մեղավոր, որ ՀԱԿ-ն այդպիսի անբարենպաստ վիճակում է: «Ճիշտ կլիներ, որպեսզի պարոն Զուրաբյանն իր քաղաքական ֆիասկոյի պատճառները տեսնի ոչ թե Դաշնակցության, այլ իր քաղաքական թիմի մեջ»,- հավելեց նա:

Շարմազանովն անդրադարձավ նաև Զուրաբյանի այն հայտարարությանը, թե ՀՀ Նախագահ Սերժ Սարգսյանի վերջին ելույթում որևէ դրական բան չկա: Նա նշեց, որ ոչնչով չի կարող օգնել Զուրաբյանին, որ նա այդ ելույթում դրական բան չի տեսել: «Ինչպես ասված է Ավետարանում՝ «ով աչք ունի թող տեսնի, ով ականջ ունի թող լսի»»,- եզրափակեց ԱԺ փոխնախագահը: