Մաշկը լվալու և հարթեցնելու կատարյալ միջոց

Wnews.am-ը գրում է.

Դեմքը  լվանալու սխալ ընտրված կամ անորակ միջոցները կարող են մաշկի խնդիրների առաջացման պատճառ հանդիսանալ. կորյակներ, կարմրություն, ճաքճվածություն եւ այլն։ Հենց այս պատճառով էլ կարեւոր է ընտրել ճիշտ միջոցներ։
Ընդհանրապես, խանութներում վաճառվող շատ միջոցներ թույլ են կամ ոչ արդյունավետ։ Եթե երբեւէ կարդացել եք կոսմետիկայի տարաների վրա գրված բաղադրիչները, ապա գիտեք, որ դրանք քիմիական են եւ դրանց ծագման եւ ազդեցության մասին քչերս ենք տեղյակ։
Օճառի ընտրության հարցում հիշեք, որ որքան կարճ է դրա բաղադրիչների ցանկը,  այնքան այն լավն է։
Wnews.am-ը  ներկայացնում է մաշկի լվացման միջոց, որը կարող եք ինքնուրույն պատրաստել տնային պայմաններում։

Դրա համար անհրաժեշտ է ընդամենը երկու հասանելի բաղադրիչ. փոքրիկ տարայում խառնեք կոկոսի յուղն ու կերակրի սոդան։ Համոզվեք, որ սոդան շատ մանր է, իսկ եթե ոչ, մանրացրեք այն։
Թե ինչ քանակով խառնել այս երկու բաղադրիչները, կախված է մաշկի տեսակից։
Զգայուն մաշկ ունեցողները պետք է պահպանեն 2:1 քանակը. այսինքն երկու անգամ շատ կոկոսի յուղ։
Նրանք, ովքեր ցանկանում են չորացնել մաշկը, բաղադրիչները պետք է հավասարապես խառնեն։
Այս «օճառը» մաշկին քսեք մերսող շարժումներով։ Այն կարելի է դեմքին թողնել անգամ մի քանի րոպե, որից հետո լվանալ տաք ջրով։
Եթե այս պրոցեդուրան մեկ ամիս շարունակ կրկնեք շաբաթական երեք անգամ, ապա կնկատեք, որ մաշկը հարթ է, մաքուր եւ առողջ։
Դիմակն օգնում է ազատվել կորյակներից եւ հետքերից, մաշկի կարմրությունից։
Կոկոսի յուղն ունի հակաբակտերիալ ուժեղ հատկություն։ Այն հոյակապորեն մաքրում է մաշկի ծակոտիները։
Կերակրի սոդան ոչ միայն մաքրում է մաշկը, այլ նաեւ վերականգնում թթվածնային բալանսը։