Առաջնության պրոֆեսիոնալ կարգավիճակը որևէ կերպ կապված չէ առաջնության մասնակից ակումբների թվաքանակի հետ

Հայաստանի ֆուտբոլի ֆեդերացիայի  Արտոնագրման բաժնի պետ Արթուր Ազարյանը ՀՖՖ պաշտոնական կայքում պարզաբանումներ է ներկայացրել մամուլում տարածված տեղեկատվության վերաբերյալ, ըստ որի՝ «Ուլիս» ՖԱ-ի լուծարումից հետո Հայաստանի առաջնությունը, իբր, կարող է զրկվել պրոֆեսիոնալ կարգավիճակից և տեղ կորցնել Եվրոպական ակումբային մրցաշարերում:

«Արմենպրես»-ի տեղեկացմամբ՝ պարզաբանման մեջ մասնավորապես ասված է.  «Շրջանառվող  տեղեկությունների համար,որպես հիմք, ընդունվում է առեղծվածային ինչ-որ կանոն, համաձայն որի ՈւԵՖԱ-ն անդամ ասոցացիաներից պահանջում է, որ բարձրագույն խմբի առաջնությունում հանդես գան առնվազն 8 թիմ:  Հայաստանի, ինչպես նաև ՈւԵՖԱ-ի անդամ բոլոր մյուս երկրների մասնակցության տեղերը ՈւԵՖԱ-ի Չեմպիոնների Լիգայի կամ Եվրոպայի Լիգայի Խաղարկություններում որոշվում է միմիայն ՈՒԵՖԱ-ի ասոցացիաների և ակումբային վարկանիշային աղ յուսակներով»:

2015/2016 թթ. մրցաշրջանից առաջ Հայաստանն այդ աղյուսակում զբաղեցնում էր 49-րդ հորիզոնականը: Այդ վարկանիշը թույլ է տալիս ունենալ 1 մասնակից Չեմպիոնների Լիգայի խաղարկության որակավորման փուլում (երկրի չեմպիոնը) և 3 մասնակից Եվրոպա Լիգայի խաղարկությունում (առաջնության 2-րդ և 3-րդ մրցանակակիրները և Հայաստանի գավաթակիրը): Այս դրույթը մինչ օրս ուժի մեջ է և որևէ հավելում կամ լրացում չունի: ՈւԵՖԱ-ն իր մրցաշարերին մասնակցելու հնարավորություն է ընձեռում՝ հիմնվելով միայն վերոնշյալ աղյուսակային դասակարգման վրա:

Հայտարարության մեջ նաեւ նշշվում է, որ լրացուցիչ անգամ ֆեդերացիայում ուսումնասիրել են   ՈՒԵՖԱ-ի 2015-16թթ. մրցաշարերի բոլոր կանոնակարգերն անխտիր, սակայն առաջնության մասնակիցների քանակի վերաբերյալ և սրանից բխող կարգավիճակի փոփոխության մասին որևէ դրույթ կրկին  չեն հայտնաբերել:

Փոխարենը, ՈւԵՖԱ-ի՝ Չեմպիոնների Լիգայի և Եվրոպա Լիգայի 2015/16թթ. մրցաշրջանի համար նախատեսված կանոնակարգերի հոդված 3-ի (մրցաշարի մասնակցության կարգ), ինչպես նաև հավելվածներ A և D-ի համաձայն, ՈւԵՖԱ-ի անդամ ասոցացիաները և ասոցացիայի ակումբները ներգրավվում են ՈւԵՖԱ-ի ակումբային մրցաշարեր իրենց տնային առաջնությունների միջոցով՝ համաձայն տվյալ ասոցացիայի վարկանիշային աղյուսակում գրաված հորիզոնականի, իսկ այդ վարկանիշները Եվրոպական ֆուտբոլային ղեկավար մարմնի կողմից հաշվարկվում են տվյալ երկրի ակումբների՝ Չեմպիոնների Լիգայի և Եվրոպայի Լիգայի խաղարկություններում վերջին 5 տարիների ընթացքում գրանցած արդյունքների հիման վրա: Օրինակ՝ 2015/16 թթ. ասոցացիայի վարկանիշը որոշվել է 2009/10-2013/14 թթ. մրցաշրջանների արդյունքների հիման վրա:

Ինչ վերաբերում է ակումբների 2015/16թթ. մրցաշրջանի վարկանիշներին, դրանք որոշվում են 2010/11-2014/15թթ. Չեմպիոնների Լիգայի և Եվրոպայի Լիգայի խաղարկություններում անդամ ասոցացիայի ակումբների գրանցած արդյունքների հիման վրա:

«Հուսանք՝ ներկայացված բոլոր փաստարկները կստիպեն ի վերջո հասկանալ, որ Հայաստանի Բարձրագույն խմբի առաջնությունը չի կորցնի իր «պաշտոնական» կամ «պրոֆեսիոնալ» կարգավիճակը, ինչպես նաև այդ կարգավիճակի կորցնել կամ չկորցնելը որևէ կերպ կապված չի առաջնության մասնակից ակումների թվաքանակի հետ: Ինչպես նաեւ, որևէ կանոնակարգային դրույթով առաջնության պաշտոնական կարգավիճակ հասկացություն նույնպես գոյություն չունի, ինչը ևս բազմիցս շահարկվում է մեդիայի կողմից», -ասված է պարզաբանման մեջ: