«Գիլգամեշ»-ը, «Անուշ»-ը և Շեքսպիրը. Ռուդոլֆ Խառատյանը` օպերային թատրոնի ծրագրերի մասին

Ալ. Սպենդիարյանի անվան օպերայի և բալետի ազգային ակադեմիական թատրոնը 2017 թվականին «Գիլգամեշ» օպերա- բալետի հետ կապված հավակնոտ նպատակներ ունի. պատրաստվում է այն աշխարհի բեմեր հասցնել: Այս մասին «Արմենպրես»-ի հետ զրույցում տեղեկացրեց թատրոնի բալետմայստեր Ռուդոլֆ Խառատյանը:

«Մեր նպատակն այն պետք է լինի, որ «Գիլգամեշ»-ը մտնի աշխարհի ամենալավ բալետային խմբերի խաղացանկի մեջ: Հայկական թեմատիկան անպակաս է ներկայացումից:  Գիլգամեշը հին էպոս: Հերոսը գալիս է Մասիս սար, սարի տակ հանդիպում է Նոյին, ով Աստծուց հավերժ ապրելու շնորհ է ստացել: Հանդիպում է Նոյին, որ իմանա` ինչպես դառնալ անմահ: Նոյը նրան բացատրում է, որ դա անհնար է, և ասում. «Քո գործերն են մնալու, ոչ թե կյանքդ է հավերժ լինելու»,-պատմեց Ռուդոլֆ Խառատյանը:

ՀՀ ժողովրդական արտիստի խոսքով` ներկայացման մեջ արծարծվում են բոլոր այն խնդիրները, որոնք արդիական են նաև այսօր: «Ամենակարևոր խնդիրն այն է, որ կարողանանք Հայաստանը դուրս բերել համաշխարհային ասպարեզ»,-շեշտեց Խառատյանը:

Անդրադառնալով 2016 թվականի ծրագրերին` Ռուդոլֆ Խառատյանը շեշտեց, որ այս տարի Շեքսպիրի մահվան 400-ամյակն է, և ինքը կցանկանար «Համլետ» ու «Ռոմեո և Ջուլիետ» ներկայացնել:

«Պլաններում նաև «Անուշ» բալետն է, որը ոչ մի կապ չունի Տիգրանյանի երաժշտության և օպերայի հետ: Անուշը կլինի ժամանակից խորեոգրաֆիայով և  հայկական ֆոլկլորային երաժշտությամբ գործ: Կօգտագործվի դուդուկ, զուռնա, դհոլ»,-հավելեց նա:

Գիլգամեշի մասին էպոսը շումերաբաբելոնական ամենահին գրական ստեղծագործություններից է: Գիլգամեշը Շումերի (մ.թ.ա. 28-րդ դար) Ուրուկ քաղաքի կիսաառասպելական կառավարողն է։ «Արմենպրես»-ն ավելի վաղ անդրադարձել է էպոսի հիման վրա ներկայացում ստեղծելու գաղափարին: «Մոսկվայի կոնսերվատորիայում էի դասավանդում, այնուհետև դոկտորական աշխատանք պաշտպանելու ցանկություն առաջացավ, թեման բարդ էր՝ վերաբերում էր Գիլգամեշի էպոսին: Ես դրա հիման վրա ստեղծեցի օպերա-բալետ, աշխատեցի Տորոնտոյի և Չիկագոյի համÕ �լսարանների շումերագետների հետ, որպեսզի ամեն ինչ ճիշտ իրականացվի: Գործը դեռ չի հնչել, հնարավոր է կատարվի Հայաստանում»,-մեզ հետ զրույցում նշել էր կոմպոզիտոր Աշոտ Արիյանը: