Կառավարությունը բարձր է գնահատում ոստիկանության գործունեությունը

Վարչապետ Հովիկ Աբրահամյանի գլխավորությամբ կառավարությունում այսօր քննարկվել է ՀՀ կառավարությանն առընթեր Ոստիկանության՝ 2015 թ. ընթացքում կատարված հիմնական աշխատանքների, ՀՀ կառավարության 2015 թ. գործունեության միջոցառումների ծրագրի, գերակա խնդիրների կատարման եւ գնահատված կատարողականի հաշվետվությունը:

ՀՀ ոստիկանության պետ Վլադիմիր Գասպարյանը զեկուցել է, որ ՀՀ կառավարության՝ 2015 թ. գործունեության միջոցառումների շրջանակում նախապատրաստվել եւ ՀՀ կառավարություն են ներկայացվել «Օտարերկրացիների մասին» եւ «Վարչական իրավախախտումների վերաբերյալ ՀՀ օրենսգրքում լրացում կատարելու մասին» ՀՀ օրենքների նախագծերի փաթեթը, ինչպես նաեւ «ՀՀ քաղաքացիների` ՀՀ մուտք գործելու եւ ՀՀ-ից ելքի մասին» ՀՀ օրենքի նախագիծը:

Գերակա խնդիրների շրջանակում համայնքային ոստիկանության գործունեության ընդլայնման նպատակով կատարվել է լայնածավալ աշխատանք՝ համայնքային ոստիկանության 6 հենակետի ստեղծման, անհրաժեշտ գույքի եւ տեխնիկայի ձեռքբերման, համայնքային խորհուրդների ձեւավորման եւ համայնքային ոստիկանության ծառայողների վերապատրաստման ուղղությամբ: ՀՀ ոստիկանապետը նշել է, որ 5 հենակետի կառուցման աշխատանքներն ավարտված են, 1-ինը շուտով կավարտվի, եւս 2-ի կառուցման շինարարական աշխատանքներն ընթացքի մեջ են, իսկ մնացած ուղղություններով միջոցառումները շարունակվում են: Մյուս գերակա խնդրի շրջանակում իրականացվել են ՀՀ Կոտայքի մարզի Հաշվառման քննական ստորաբաժանման կապիտալ վերանորոգման եւ ՀՀ Տավուշի մարզի Հաշվառման քննական ստորաբաժանման վերակառուցման նախապատրաստական աշխատանքներ:

Վլադիմիր Գասպարյանն անդրադարձել է նաեւ հաշվետու տարում Ոստիկանությունում կատարված հիմնական աշխատանքներին, մանրամասներ ներկայացրել իրականացված մի շարք բարեփոխումների եւ կառուցվածքային-կազմակերպչական միջոցառումների վերաբերյալ: Շարունակվել եւ ընդլայնվել է միջազգային կազմակերպությունների եւ օտարերկրյա պետությունների համապատասխան ծառայությունների հետ համագործակցությունը, Ոստիկանության աշխատակիցների համար իրականացվել են աշխատանքային պայմանների բարելավման ծրագրեր, վերանորոգվել, տեխնիկապես վերազինվել եւ հագեցվել են Ոստիկանության մի շարք ենթակառուցվածքներ եւ այլն:

Վարչապետը դրական է գնահատել ՀՀ ԿԱ Ոստիկանության 2015 թ. գործունեությունը եւ կատարված աշխատանքները: Հովիկ Աբրահամյանն ընդգծել է, որ իրականացված բարեփոխումների դրական արդյունքներն ակնառու են եւ´ կառավարության, եւ´ հասարակության համար եւ հորդորել շարունակել նույն տեմպով: