Հայաստանում, ցավոք, բարոյական վնասի հատուցման ինստիտուտը զարգացած չէ

Էմիլ Մարկոսյանը ֆեյսբուքյան իր էջում գրում է.

«Սոցիալական ցանցերում դիմացինին վիրավորողը պետք է հասկանա, որ իր գրածները կարող են կարդալ նաև իր մերձավորները, հարազատները և պատկերացում կազմել իր մասին»,- այսօր լրագրողների հետ հանդիպմանը, խոսելով սոցիալական ցանցերում օգտատերերի կողմից կատարվող ոչ կոռեկտ և վիրավորական գրառումների և մեկնաբանությունների մասին, նշեց իրավաբան Էմիլ Մարկոսյանը` հավելելով, որ իրավական բազմաթիվ հոդվածներ կան, որոնք առնչվում են այս հարցին:
Իրավաբանը գտնում է, որ պետք է հեռացնել անվայել, անբարո մեկնաբանությունները, քանի որ դրանք չջնջելու դեպքում որոշ մարդիկ առիթավորվում են և իրենք էլ են փորձում ինքնահաստատվել: 

Է. Մարկոսյանն էլ ընդգծեց, որ Եվրոպական շատ պետություններում, անգամ Ռուսաստանում գոյություն ունի ինտերնետային ոստիկանություն, որի գործառույթն է հետևել սոցցանցերին` հայտնաբերելով իրավախախտումները. «Եթե ՌԴ պես մեծ պետության, նման բազմաքանակ օգտատերերի դեպքում հնարավոր է վերահսկել այդ ոլորտը, ապա փոքր Հայաստանի դեպքում դա շատ ավելի հեշտ է»,- ասաց նա` համոզմունք հայտնելով, որ անհրաժեշտ է օրենսդրորորեն կարգավորել ոլորտը:

Անդրադառնալով ԱԺ ՀՀԿ խմբակցության պատգամավոր, երգչուհի Շուշան Պետրոսյանի «Ֆեյսբուք» սոցիալական ցանցում դրսևորած վարքին` իրավաբանն իր անձնական տեսակետը հայտնեց, որ նրա գրառումն իսկապես սպառնալիք է, բայց սպառնալիքը դեռ հանցագործություն չէ. «Ցանկացած անձ կարող է սպառնալ մյուսին, բայց դա չի նշանակում, որ ի կատար կածի իր սպառնալիքը: Հայաստանում, ցավոք, բարոյական վնասի հատուցման ինստիտուտը զարգացած չէ»,- նշեց նա` համոզմունք հայտնելով, որ նմանաբովանդակ արտահայտությունների դեպքում` դրանք տեղ կգտնեն լրատվամիջոցում, թե մարդու անձնական էջում, տվյալ անձը պետք է պատասխանատվության ենթարկվի. «Կան ֆեյսբուքյան օգտատերեր, ովքեր որոշ կայքերից շատ ավելի հետևողներ, մեկնաբանողներ ունեն»: