Հայուհիների բացահայտումները. ամուսնացած եմ համասեռամոլի հետ
Life
«Սերը դաժան է, նաև միասեռականի կսիրես…»,- այսպես է սկսում իր առաջին անհաջող ամուսնության պատմությունը 35-ամյա Անուշը:
«Ես, իհարկե, չգիտեի, որ նա համասեռամոլ է: Հետագայում պարզվեց, որ բոլորն այդ մասին տեղյակ էին, բացի հիմարիկ հարսնացուից: Այն ժամանակ 23 տարեկան էի, նրա հետ ծանոթացա ընդհանուր ընկերների մոտ: Արտաքինից նորմալ տղա էր, առանց կանացի շարժուձեւի: Անկեղծ ասած՝ այն ժամանակ շատ էի ցանկանում ամուսնանալ: Չեմ կարող ասել, որ խենթի նման սիրահարվել էի, բայց որոշակի համակրանք մեր միջեւ կար, եւ երբ կես տարի հանդիպելուց հետո նա ինձ ամուսնության առաջարկ արեց, ես, առանց երկար մտածելու, համաձայնեցի»,- հիշում է Անուշը:
Խնդիրները սկսվեցին ամուսնական առաջին իսկ գիշերը, երբ տանջալից մերձեցման ակտից հետո նորաթուխ ամուսինը սկսեց պահանջներ ներկայացնել կուսություն ապացուցող արյան բացակայության կապակցությամբ:
«Փոքր-ինչ հանգստացավ միայն այն ժամանակ, երբ տեսավ արյան բծերը: Հիշելն անգամ զզվելի է: Ամբողջ մեղրամիսը մղձավանջ էր: Առաջին գիշերվանից հետո մենք սեքսով զբաղվեցինք, հավանաբար, եւս մեկ կամ երկու անգամ: Այն ժամանակ չէի հասկանում, թե խնդիրն ինչ է: Նաեւ այն, թե ինչու նա հանկարծ այդպես սառն ու կոպիտ դարձավ: Սկանդալներ լինում էին ցանկացած առիթով, իսկ երբ երկու ամիս անց ես դեռ հղի չէի, ավելի դժվար դարձավ:
Կարճ ասած՝ այս ամենը շուրջ կես տարի տեւեց, եւ ես հեռացա»,- հիշում է Անուշը:
«Երբ ինձ ասացին, որ նա համասեռամոլ է, ես, բնականաբար, սկզբում չհավատացի: Բայց երբ գտնվեցին, այսպես կոչված, «վկաներ», սկսեցի կասկածել: Պարզվեց, որ իմ նախկինը նույնիսկ ապրել է տղամարդու հետ, իհարկե՝ Հայաստանից դուրս, իսկ նրա ոչ ավանդական սեռական կողմնորոշման մասին գրեթե ամբողջ քաղաքը գիտեր: Վիրավորված էի, իսկ հետո նույնիսկ սկսեցի խղճալ: Նրա ընտանիքը շատ պահպանողական է, եւ երբեք նրան չէր ընդունի այդպիսին: Ընտանիքը, իբր, մինչեւ հիմա տեղյակ չէ այդ մասին: Ի դեպ, հետո նա ամուսնացավ, երեխաներ ունի, բայց ես նրան մի քանի անգամ տեսել եմ որոշակի սեռական կողմնորոշմամբ տղամարդկանց շրջապատում: Հայաստանում նման թաքնված միասեռականները քիչ չեն: Արտաքինից պատկառելի տղամարդ է, ընտանիքի տեր եւ ամեն ինչ նրա մոտ, կարծես, կարգին է, բայց մեկ այլ՝ գաղտնի կյանքում նրան կանացի անունով են դիմում, եւ ուժեղ սեռի ներկայացուցիչներին է նախընտրում: Խղճում եմ այդպիսի մարդկանց, չէ՞ որ ամբողջ կյանքում կեղծիքի մեջ են ապրում»,- ասում է մեր հերոսուհին:
Ի տարբերություն Անուշի, 27-ամյա Գայանեն մինչեւ հիմա ամուսնացած է… համասեռամոլի հետ:
«Ես նրան մինչեւ ականջներս սիրահարվեցի մեր առաջին իսկ հանդիպման ժամանակ: Ինձ ասում էին, որ նա ոչ ավանդական սեռական կողմնորոշում ունի, բայց այն ժամանակ ինձ համար միեւնույն էր: Արմենն ինձ դուր էր գալիս ինտելեկտով, հումորի զգացումով, խելքով: Նա հրաշալի զրուցակից է: Նրա հետ ես կարող էի ամեն ինչի մասին խոսել: Բնականաբար՝ սկզբում պարզապես ընկերներ էինք, ամեն դեպքում՝ նրա կողմից: Հետո նրա սիրտը կոտրեցին, եւ ես մխիթարում էի նրան: Մենք շատ մտերմացանք, եւ ես խոստովանեցի զգացմունքներս: Միամտորեն կարծում էի, որ մեծ եւ լուսավոր սերը կարող է սարեր շրջել, նույնիսկ միասեռականին նորմալ կողմնորոշման վերադարձնել: Նա վստահեցնում էր, որ սիրում է ինձ, եւ ես որոշել էր «փրկել» նրան եւ ճիշտ ուղու վրա դնել: Որոշեցինք ամուսնանալ: Մեկ տարի անց դուստր ունեցանք: Արմենը երջանիկ էր: Նա հիասքանչ հայր է. զգայուն, ուշադիր, հոգատար,- ժպտալով պատմում է Գայանեն:- Մեր աղջկա ծննդից մեկուկես տարի անց իմացա, որ նա սիրեկան ունի: Նա ինքը խոստովանեց, չնայած ես գուշակում էի…
Մեր փոքրիկի ծննդից հետո մեր ինտիմ կյանքը վերացավ, չնայած դրանից առաջ էլ այն չէր կարելի շատ կրքոտ անվանել»:
Գայանեի խոսքով, որոշ ժամանակ դեռեւս փորձում էր ամուսնուն ավանդական կողմնորոշման վերադարձնել, տանում էր հոգեբանների, սեքսոլոգների եւ սեքսոպաթոլոգների մոտ, բայց հետո հասկացավ, որ բոլոր ջանքերն իզուր են:
«Ինչո՞ւ չհեռացա նրանից… Մենք մտածում էինք ամուսնալուծության մասին, եւ նույնիսկ փաստաթղթերը ներկայացրեցինք: Բայց հետո նստեցինք, խոսեցինք եւ որոշեցինք միասին մնալ: Հանուն մեր դստեր, հանուն ընտանիքի: Անկախ ամեն ինչից՝ մենք սիրում եւ հարգում ենք միմյանց: Թող որ այդ տղամարդու եւ կնոջ սեր չէ, բայց ինձ համար այդ նույնիսկ ավելին է…»:
Յուլիա Վարդանյան
(հերոսների անունները փոփոխված են)
1
2
3
4
5
1
2
3
4
5
5
