Անցնող օրվա կարևոր իրադարձությունները երկու տողով. 16.02.2016

Նարեկ Միրզոյանը ֆեյսբուքյան իր էջում գրում է.

◉ Ցյուրիխում ընթացող «Չեսս Չելլենջ 2016» մրցաշարում կայացել են բլից պարտիաները, որոնց ընթացքում Լեւոն Արոնյանը 3 պարտություն է կրել: Հայ շախմատիստը զիջել է Անանդին, Կրամնիկին եւ Նակամուրային: Ոչ ոքի է խաղացել Գիրիի հետ եւ հաղթել Շիրովին: Մրցաշարի 1-ին եւ 2-րդ շրջանի հանդի պումներից հետո վաստակած 5,5 միավորով Արոնյանը նախավերջին 5-րդ հորիզոնականում է:

◉ Ղարաբաղա-ադրբեջանական հակամարտ զորքերի շփման գծում փետրվարի 15-ին և լույս 16-ի գիշերը հակառակորդը տարբեր տրամաչափի հրաձգային զինատեսակներից հայ դիրքապահների ուղղությամբ արձակել է ավելի քան 800 կրակոց: Բացի վերոնշյալից, ՊԲ հյուսիսարևելյան ուղղությամբ հակառակորդը կիրառել է նաև ՀԱՆ-17 տիպի նռնականետ:

◉ Գեղարքունիքի մարզի 16 համայնքներում այս տարի ՀՀ կառավարության աշխատակազմի «Գյուղական տարածքների տնտեսական զարգացման ծրագրերի իրականացման գրասենյակ» պետական հիմնարկի կողմից կիրականացվեն խմելու եւ ոռոգման ջրատար ցանցերի նորացման եւ կառուցման լայնածավալ աշխատանքներ:

◉ Թուրքիայի արտաքին գործերի նախարարությունը Սիրիայում Ռուսաստանի օդուժի գործողությունները դատապարտող հայտարարություն է տարածել: Թուրքիայի ԱԳՆ կայքում տեղադրված հայտարարության մեջ պաշտոնական Անկարան մեղադրել է Ռուսաստանին` Մյունխենում հրադադարի մասին որոշման ընդունումի ց հետո Սիրիայում գործողությունները չդադարեցնելու մեջ:

◉ Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսի հայրապետական տնօրինությամբ Մայր Աթոռ Ս. Էջմիածնի միաբաններ Հոգեշնորհ Տեր Անանիա աբեղա Ծատուրյանը և Հոգեշնորհ Տեր Համբարձում աբեղա Արաբյանը ծառայության են կոչվել Մայր Աթոռի Վանորեից տեսչությունում:

◉ Երևանի քաղաքապետի տեղակալ Վահե Նիկոյանը Բրյուսովի 66 հասցեի չորրորդ կարգի վթարային շենքի բնակիչներին է հանձնել նորակառույց շենքերում բնակարան հատկացնելու մասին Երևանի քաղաքապետի որոշումներն ու բնակարանների բանալիները: Քաղաքապետի տեղակալը շնորհավորել է նոր բնակարանների տերերին և նշել, որ սահմանված կարգով անհրաժեշտ է որոշման մեջ առկա ժամկետներում ազատել հին, վթարային բնակարանները:

◉ ԵԱՀԿ Մինսկի խմբի նպատակը ղարաբաղյան հակամարտության խաղաղ կարգավորումն է: Այս մասին հայտարարել է Ադրբեջանում ԱՄՆ դեպսան Ռոբերտ Սեկուտան:

◉ Սիրիան «այլ ընտրություն չունի, քան պատերազմում հաղթանակի հասնելը»: Այդ մասին Դամասկոսում հայտարարել է նախագահ Բաշար Ասադը՝ նախազգուշացնելով, որ երկիրը ելուզակային կազմավորումներից ազատագրելու համար «հարկ կլինի բարձր գին վճարել»:

◉ ՀՀ մշակույթի նախարարության և Հայաստանում Շվեդիայի դեսպանատան աջակցությամբ փետրվարի 21-ին Ա. Սպենդիարյանի անվան օպերայի և բալետի ազգային ակադեմիական թատրոնում տեղի կունենա հոբելյանական համերգ՝ նվիրված ՀՀ ժողովրդական արտիստ, Հայաստանի պարարվեստի «Բարեկամություն» պետական համույթի գեղարվեստական ղեկավար Նորայր Մեհրաբյանի ծննդյան 75-ամյակին:

◉ Շարունակվում են ՀՀ ավտոճանապարհներին երթևեկության նկատմամբ վերահսկողության և իրավախախտումների արձանագրման արագաչափ սարքերի տեղադրման աշխատանքները: Մասնավորապես, 2016 թվականի փետրվարի 17-ից Երևան քաղաքի Խանջյան փողոցում տեղադրված արագաչափ սարքի միջոցով արձանագրվելու են նաև հանդիպակաց ուղղությամբ երթևեկող տրանսպորտային միջոցների վարորդների կողմից երթևեկության սահմանված արագությունը գերազանցելու դեպքերը:

◉ Միջազգային հաքերային Anonymous խումբը հարձակում է իրականացրել Թուրքիայի անվտանգության գլխավոր վարչության կայքի վրա: Հարձակման հետևանքով Անվտանգության գլխավոր վարչությանը պատկանող մոտ 18 Gb ծավալով ինֆորմացիան հայտնվել է համացանցում:

◉ Հայաստանի զբոսաշրջության ոլորտում հիմնական և կարևորագույն խնդիրը հայկական զբոսաշրջային արդյունքի մրցունակության բարձրացումն է և այդ ուղղությամբ կան մի շարք խնդիրներ: Այս մասին փետրվարի 16-ին հրավիրված ասուլիսում նշեց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը` անդրադառնալով զբոսաշրջության ոլորտում առկա խնդիրներին և հեռանկարներին:

◉ ՀՀ վարչապետ Հովիկ Աբրահամյանի գլխավորությամբ կառավարությունում քննարկվել է ՀՀ արդարադատության նախարարության, Դատական ակտերի հարկադիր կատարման և Քրեակատարողական վարչության կողմից 2015թ. ընթացքում իրականացրած աշխատանքների, գերակա խնդիրների, ՀՀ կառավարության 2015 թ. գործունեության միջոցառումների ծրագրի կատարման և գնահատված կատարողականի հաշվետվությունը:

◉ Վարչապետ Հովիկ Աբրահամյանի գլխավորությամբ կառավարությունում քննարկվել է ՀՀ տարածքային կառավարման և արտակարգ իրավիճակների նախարարության (ՏԿԱԻՆ)՝ 2015թ. ընթացքում կատարված հիմնական աշխատանքների, ՀՀ կառավարության 2015թ. գործունեության միջոցառումների ծրագրի, գերակա խնդիրների կատարման և գնահատված կատարողականի հաշվետվությունը:

◉ Վարչապետ Հովիկ Աբրահամյանի գլխավորությամբ կառավարությունում փետրվարի 16-ին քննարկվել է ՀՀ մշակույթի նախարարության՝ 2015թ. ընթացքում կատարված հիմնական աշխատանքների, գերակա խնդիրների, ՀՀ կառավարության 2015թ. գործունեության միջոցառումների ծրագրի կատարման և գնահատված կատարողականի հաշվետվությունը:

◉ Հանրապետության տարածքում փետրվարի 17-19-ին սպասվում է առանց տեղումների եղանակ, 20-21-ին շրջանների մեծ մասում սպասվում են տեղումներ: Քամին արևմտյան՝ 2-7 մ/վրկ արագությամբ: Օդի ջերմաստիճանը փետրվարի 17-18-ին էապես չի փոխվի, 19-21-ին աստիճանաբար կնվազի 4-6 աստիճանով: