Մարտարվեստներով զբաղվող ֆեդերացիաների աշխատանքը կկանոնակարգվի

Հայաստանի սպորտի եւ երիտասարդության հարցերի նախարար Գաբրիել Ղազարյանը  փետրվարի 16-ին հյուրընկալվել էր Հայաստանի կարատեի ֆեդերացիայում: Ինչպես հաղորդում է «Արմենպրես»-ը, այցի նպատակը ֆեդերացիայն աշխատանքներին եւ մարզիչների հետ  ծանոթանալն էր: Նախարարի դիտարկմամբ, այս այցով մարտարվեստների ֆ եդերացիաների հետ համագործակցության նոր սկիզբ է ազդարարվում: Նրա խոսքերով անհրաժեշտությունն է առաջացել առհասարակ կանոնակարգել մարտարվեստներով զբաղվող ֆեդերացիաների աշխատանքները:

«Այդ ֆեդերացիաներն առհասարակ վերահսկողությունից դուրս են մնացել,  մինչդեռ նրանց աշխատանքում բազմաթից ռիսկեր կան, որոնք վերաբերում են ինչպես ազգային անվտանգությանը, այնպես էլ կոռուպցիոն ռիսկերին: Առաջիկայում նախատեսվում է ստուգումներ իրականացնել ֆեդերացիաներում, իսկ դա ենթադրում է, որ որոշ ֆեդերացիաներ կարող են փակվել»,- ասել է նա:

Կարատեի ֆեդերացիայի նախագահ Գրիգոր Միխաելյանը նշեց, որ իրենց համար շատ կարեւոր է նախարարության հետ համագործակցության խորացումը, քանի որ Բրազիլիայում կայանալիք օլիմպիական խաղերից հետո քննարվելու է 8 մարզաձեւերի՝ օլիմպիական խաղերում ներառելու հարցը: «Կա 2 մարզաձեւ, որոնք ամենայն հավանականությամբ կհամալրեն օլիմպիական մարզաձեւերի շարքը: Այդ մարզաձեւերից մեկն էլ կարատեն է:  2020թ-ի օլիմպիական խաղերը անցկացվելու են Ճապոնիայում, իսկ այդ երկրի համար կարատեն ավանդական մարզաձեւ է, հետեւաբար մեծ է հավանկանությունը, որ կարատեն կդառնա օլիմպիական մարզաձեւ»,- նշեց Գ. Միխաելյանը:

Այցի ընթացքում ֆեդերացիայի անդամները ցուցադրական ելույթներ ունեցան: Ֆեդերացիայի նախագահը կարատեի ֆեդերացիայի պատվավոր նախագահին՝ նախարար Գ. Ղազարյանին նվիրեց  Նոր Կտակարան եւ ֆեդերացիայի գավաթը: