Ադրբեջանը վերածվում է Գուանտանամոյի

Ադրբեջանի իշխանությունը մշտապես աշխատում է ապացուցել, որ իբր աշխարհի բոլոր վայրերում մեծացել է բռնությունը, մարդկանց իրավունքները խախտվում են եւ միակ դրախտավայրը Ադրբեջանն է: Իշխանամետ հեռուստաալիքներն անընդհատ ցուցադրում են աշխարհի տարբեր վայրերում բողոքի ակցիաներ, երկրաշարժեր, փլուզումներ, ոստիկանական ճնշումներ, ինչով աշխատում են քաղաքացուն կոչ անել «փառք» տ ալ եւ ասել, թե չնայած երկրում համատարած կոռուպցիա եւ անարդարություն է, բայց պետք է դիմանալ հանուն կայունության:

Այս մասին, ինչպես հաղորդում է «Արմենպրես»-ը, գրում է «Ազադլըգ» թերթը` նշելով, որ հատկապես, մարդու իրավունքների, ազատությունների մասին խոսք գնալու ժամանակ կառավարությունը օրինակ է բերում Գուանտանամո բանտը եւ հրատարակում այդ բանտում բանտարկյալներին պատժելու մասին հոդվածներ:

«Սակայն, երկրի բանտերում տեղի ունեցող իրադարձությունները ցույց են տալիս, որ Ադրբեջանն ինքն է վերածվել Գուանտանամոյի, քանի որ ամեն օր հայտնի են դառնում երկրի բանտերում տիրող ցավալի դեպքերի եւ դատապարտյալներին գազանաբար խոշտանգելու ու սպանելու մասին փաստեր», -գրում է թերթը:

Վկայակոչելով «Ենի Մուսավաթ» թերթը, «Ազադլըգ»-ը հայտնում է, որ փետրվարի 12-ին Բաքվի թիվ 6 քրեակատարողական ծառայության հաստատությունում վերակացուները մահացու ծեծի են ենթարկել երկու դատապարտյալի, երկու դատապարտյալ կիսակենդանի վիճակում տեղափոխվել են հիվանդանոց: Եւս երկու դատապարտյալի ճակատագրի մասին էլ տեղեկություններ չկան:

Թերթին հասած տեղեկությունը հաստատել է մահացածներից մեկի եղբայրը` Ռամին Իբրահիմովը:

«Զանգահարեցին եւ հայտնեցին, որ Նուրանին մահացել է ստամոսքի ցավերից, նրա դիակը գտնվում է դիարանում: Գնացինք այնտեղ եւ տեսանք, որ նրա ոտքերը կոտրված են, կրունկները սեւացել են, իսկ թոքերը հարվածներից բզկտվել: Նրան ծեծել եւ սպանել են», -ասել է նա` նշելով, որ իր 23-ամյա եղբայրը ընդամենը 10 օր առաջ էր տեղափոխվել քրեակատարողական հիմնարկ:

«Երկրորդ մահացածի` Սահիբ Աբբասովի մարմինը տարել են Գյանջա: Մյուս դատապարտյալներ Էլմիրը եւ Թարիելը ծանր վիճակում գտնվում են հիվանդանոցում: Մնացած երկու դատապարտյալի մասին տեղեկություն չկա», -հավելել է նա:

Թերթը գրում է, որ նման սպանություններն Ադրբեջանի քրեակատարողական հաստատություններում առաջին անգամը չէ: 2014 թվականի դեկտեմբերի 22-ին Գարադաղի շրջանի թիվ 14 քրեակատարողական ծառայության հաստատությունում մահացել էր դատապարտյալ Էլշադ Բաբաեւը: Հետո պարզվել էր, որ նա մահացել է սարսափելի խոշտանգումներից: Նրան ծեծել եւ խոշտանգել են բանտի ղեկավարության ներկայացուցիչները: Նույն բանտում կախվելով կյանքին վերջ էր տվել դատապարտյալ Սուբհայ Իբրահիմովը:

Նշելով, որ Ադրբեջանի բանտերում բացասական դեպքերի ու նման սպանությունների հետ կապված փաստեր շատ կան, թերթը պատասխան է սպասում Գուանտանամո բանտի համար ԱՄՆ-ին դատապարտող Ադրբեջանի կառավարությունից եւ շեշտում, որ Ադրբեջանի բանտերը վերածվել են խոշտանգումների որջերի:

«Ադրբեջանում անպատժելիությունը, անիրավությունը բանտերը Գուանտանամոյից ավելի վատ վիճակի են վերածել: Եթե Ադրբեջանում գեներալները գաղտնի բանտեր են կարողանում պահել, վերեւների պատվերով անմեղ մարդիկ են ձերբակալվում, նշանակում է, ցանկացած դատապարտյալի սպանությունը հասարակ գործ է: Այդ ավանդույթն ինքը` կառավարությունն է ստեղծել: Համակարգը բոլոր բնագավառները նմանեցրել է իրեն եւ ստեղծել Ադրբեջանի Գուանտանամո: Այնպես որ, պետք չէ նեգատիվ որոնել այլ երկրներում, Ադրբեջանը խեղդվում է նեգատիվների առատությունից», -ամփոփում է թերթը: