Տեառնընդառաջի կրակը վառվեց Գեղարքունիքի մարզի բոլոր եկեղեցիներում
Հասարակություն
Հազարամյակներ շարունակ հայերի մոտ մեծ Ժողովրդականություն վայելող Տերնդեզը կամ Տեառնընդառաջը Գեղարքունիքի մարզում նշում են թե ընտանիքներում, թե եկեղեցիներում:
Ինչպես «Արմենպրես»-ին տեղեկացրեց Գեղարքունյաց թեմի առաջնորդական տեղապահ Տեր Կիրակոս Վարդապետ Դավթյանը, Գեղարքունիքի մարզի հինգ տարածաշրջանների բոլոր ծխատեր եկեղեցիներում փետրվարի 13-ին տրվել է երեկոյան ժամերգություն, որից հետո բոլոր եկեղեցիների բակերում վառվել է Տեառնընդառաջի կրակը՝ իր շուրջ հավաքելով ազգաբնակչությանն ու նորապսակներին:
Տեառնընդառաջը շուքով նշվեց Գավառ քաղաքի Սուրբ Աստվածածին եկեղեցում: Տեառնընդառաջի ծիսական արարողակարգը սկվեց փետրվարի 13-ի երեկոյան: Համաձայն եկեղեցական կարգի՝ երեկոյան ժամերգությունից հետո կատարվեց նախատոնակ, որն էլ ազդարարեց տոնի սկիզբը: Նախատոնակի արարողության ավարտին կատարվեց Անդաստանի կարգ՝ աշխարհի չորս ծագերի, արտերի եւ այգիների օրհնություն:
Ապա եկեղեցու բակում կրակ վառվեց` իր շուրջ հավաքելով նախորդ տարվա փետրվարից մինչեւ այս օրը ամուսնացած նորապսակներին: Գեղարքունյաց թեմի առաջնորդական տեղապահի օրհնությունը ստացան ու պսակվադրվեցին ամուսնական երեք զույգ: Փետրվարի 14-ին Գավառի Սուրբ Աստվածածին եկեղեցում կտրվի պատարագ ու կանցնացվի նորապսակների օրհնության կարգ:
Տեառնընդառաջի տոնակատարությունը իրենց մասնակցությամբ առանձնակի շուք ու աշխուժություն կհաղորդեն Գավառի Գեղարքունյաց թեմի Գավառի համայնքային կրթական կենտրոնի սաները եւ «Գեղարեգ» կրթամշակութային հասարակական կազմակերպության անդամները:
Համայնքային կենտրոնի սաները հանդես կգան երաժշտական համարներով, ինչպես նաեւ ծիսակատարության մասնակիցներին կբաժանեն աղանձի տոպրակներ ու տարոսիկներ, որոնք եւս խորհրդանշում են տոնի խորհուրդը: «Գեղարեգ» հասարակական կազմակերպության անդամներն էլ կներկայանան ազգային ու ազգագրական երգ ու պարով՝ հարստացնելով տոնի գեղարվեստական մասը:
Տեառնընդառաջը փետրվարի 13-ին առանձնակի շուքով նշվեց բոլոր այն ընտանիքներում, որոնք կազմավորվել են նախորդ տարվա փետրվարի 13-ից հետո եւ առաջին անգամ են դիմավորում տոնը:
1
2
3
4
5
1
2
3
4
5
1
2
3
4
5
