Վարորդները պետք է պարբերաբար փորձաքննության ենթարկեն գազաբալոնները. մասնագետ

Վերջին շրջանում գազալցակայաններում տեղի ունեցած պայթյունների հիմնական պատճառն ավտոմեքենաներում տեղադրված գազաբալոնների սխալ շահագործումն է: «Ավտոմեքենաների վարորդների մեծ մասը տեղյակ չէ, որ իրենց ավտոմեքենաներում առկա գազաբալոնները պետք է գոնե տարին մեկ անգամ փորձաքննության ներկայացվեն: Հիմնականում մարդիկ ֆինանսական պատճառներից ելնելով են խուսափում այդ փորձաքննություններից` վախենալով, որ գազաբալոնները կարող են ոչ պիտանի ճանաչվել, ինչի հետևանքով իրենք ստիպված են լինելու գնել նոր գազաբալոն»,-«Անվտանգության պահպանման խնդիրները գազալցակայաններում» թեմայով քննարկմանը այս մասին հայտնեց Տարածքային կառավարման և արտակարգ իրավիճակների նախարարության գազասարքավորումների և վառելիքի օբյեկտների տեխանվտանգության փորձաքննության բաժնի պետ Ռուբեն Բադեյանը:
Նա հավելեց, որ մայիսի 12-ին Երևանի Բաբաջանյան փողոցի և մայիսի 14-ին Գառնի գյուղի գազալցակայաններում տեղի ունեցած պայթյունները գազաբալոնների սխալ շահագործման հետևանքն էին: «Երկու դեպքում էլ վարորդները չէին փորձարկել գազաբալոնները: Գառնիում տեղի ունեցած պայթյունի հետ կապված պետք է նշեմ, որ վարորդը ինքն էր տեղադրել գազաբալոնային սարքը, որի մետաղյա թիթեղի հաստությունը մոտ երկու անգամ պակաս էր նախատեսված չափանիշից»,-պարզաբանեց Բադեյանը:

Անդրադառնալով գազալցակայաններում ավտոմեքենաների գերլիցքավորման խնդրին`Ռուբեն Բադեյանն ասաց հետևյալը. «Ավտոմեքենաներում տեղադրված գազաբալոնների աշխատանքային ճնշումը չպետք է գերազանցի 200 աստիճան մթնոլորտային ճնշումը, սակայն ավտոմեքենաների գազալցման ճնշումային կայանները(ԱԳԼՃԿ) մտել են անիմաստ մրցակցության մեջ և խախտում են այդ պահանջը` ավտոմեքենաները լիցքավորելով 230-280 աստիճան մթնոլորտային ճնշման ներքո, ինչը հանգեցնում է տխուր հետևանքների»,-արձանագրեց նա:

Իր հերթին ՀՀ էկոնոմիկայի նախարարության աշխատակազմի շուկայի վերահսկողության պետական տեսչության փաստաթղթաշրջանառության և իրավական համակարգման բաժնի պետ Արծրուն Նաջարյանը նշեց, որ 2011թվականից իրականացված աշխատանքների արդյունքում ՀՀ-ում գործող 303 ԱԳԼՃԿ-եր ապահովել են գազաբաշխիչ աշտարակներով: «Այդ աշտարակների տեղադրման շնորհիվ ներկայումս ավտոմեքենաները լիցքավորելու ժամանակ ջերմաստիճանային տատանումներ չկան, ինչը ողջունելի փաստ է»,- նկատեց նա:
Նա նկատեց, որ ՀՀ կառավարությունը մշակում է համապատասխան օրենսդրական նախագիծ, որի համաձայն գազալցակայանների աշխատողները պարտավորվելու են ավտոմեքենաները լիցքավորելուց առաջ վարորդներից պահանջել գազաբալոնային սարքի հերթական փորձարկման փաստաթղթերը: «Յուրաքանչյուր փորձաքննությունից հետո վարորդին տրամադրվում է ակտ, որում նշված է գազաբալոնը հերթական փորձարկմանը ներկայացնելու ամսաթիվը: Համապատասխան օրենքի ընդունումից հետո այն տնտեսավարող սուբյեկտները, որոնք ավտոմեքենաները լիցքավորելուց առաջ չեն ստուգի համապատասխան փաստաթղթերի առկայությունը, պատասխանատվության են ենթարկվելու»,-ընդգծեց Արծրուն Նաջարյանը:

Վերջին մեկ ամսում հանրապետության գազալցակայաններում երեք պայթյուն է տեղի ունեցել, այդ թվում մահվան ելքով: Մայիսի 12-ին պայթյուն է տեղի ունեցել Երևանի Ա. Բաբաջանյան փողոցի թիվ 75 շենքի մոտակայքում գտնվող գազալցակայանում, մայիսի 14-ին` Կոտայքի մարզի Գառնի գյուղում, մահացել է 24-ամյա երիտասարդ, ով նույն գյուղի բնակիչ է: Իսկ մայիսի 26-ին, ժամը 09.52-ին ահազանգ է ստացվել, որ Էջմիածնի մայրուղում` «Զվարթնոց» ռեստորանի մոտակայքում գտնվող գազալցակայանում լիցքավորման սարքից տեղի է ունեցել պայթյուն:

Պարզվել է, որ դեռևս չբացահայտված հանգամանքն երում Հ. Հ.-ին պատկանող գազալցակայանում տեղի է ունեցել պայթյուն հրդեհի բռնկումով, ինչի հետեւանքով երեք անձ վերակենդանացման բաժանմունքում են լուրջ այրվածներով: