Վարդենիսում անցկացվեց միգրացիայի եւ թրաֆիքինգի կանխարգելումներին ուղղված միջոցառում

«Հայկական Կարիտաս»

բարեսիրական հասարարակական կազմակերպությունը Գեղարքունիքի մարզում իրականացնում է միգրացիայի եւ թրաֆիքինգի կանխարգելումներին ուղղված բազմաբնույթ ծրագրեր, որոնցից մեկն էլ անցկացվեց Վարդենիսի «Համայնքային զարգացման հիմնադրամում»:Այն կրում էր «Զարմանալի Եվրոպա» խորագիրը:

Ինչպես տեղեկացրեց «Զարմանալի Եվրոպա» ծրագրի Գեղարքունիքի մարզի համակարգող Դիանա Միրիբյանը, ծրագրին մասնակցեցին Վարդենիսի տարածաշրջանից ժամանակավոր արտագնա աշխատանքի մեկնողներ, նրանց ընտանիքների անդամներ, երիտասարդներ եւ շահագրգիռ այլ անձինք:«Հայաստանում միգրացիան տարածված երևույթ է: Մարդկանց հոսքերի վերաբերյալ դժվար է իրական թվեր ունենալ:Մասնագետների կարծիքով` մեծ թվով երիտասարդներ, հատկապե բարձրագույն կրթություն ստացողները, չեն կարողանում խոստումնալից աշխատանք գտնել:Հետեւաբար միգրացիան նրանց համար դառնում է գայթակղիչ ելք»,-նշեց Դիանա Միրիբյանը:

Ծրագրի ներկայացման ընթացքում ցուցադրվեց « Ի՞նչ է միգրացիան» խորագրով տեղեկատվական տեսանյութ, որտեղ խոսվում էր անօրինական միգրացիայի եւ դրա դրսեւորումների մասին: Այնուհետեւ քննարկման մասնակիցները «Վերադարձի հաջողված պատմություն» տեսանյութի միջոցով ծանոթացան մի ընտանիքի պատմությանը: Ֆիլմի երիտասարդ հերոսը արտերկրից կամավոր վերադարձել է Հայաստան եւ, հետադարձ հայացք ձգելով, հասկացել, որ ամեն ոք իր հայրենիքում է կարողանում ազատ զգալ իրեն: Այստեղ նրան չեն դիտում որպես օտարի, թեպետ նա քիչ է վաստակում, բայց ապրում է իր հայրենիքում ավելի լիարժեք ու իմաստավորված կյանքով:

Հանդիպման ավարտին մասնակիցները քննարկեցին միգրացիայի հնարավոր վտանգներին, հայրենիք վերադառնալուն եւ ինտեգրվելուն վերաբերող հարցեր: Ներկաները կարծիքներ հնչեցրին նաեւ ցուցադրվող ֆիլմերի վերաբերյալ: Թեմային վերաբերող թերթոնների միջոցով մարզի հանրակրթական հաստատություններում աշակերտների շրջանում եւս կատարվում են իրազեկման աշխատանքներ: