Բրիտանական կինոարվեստի լավագույն գործերը կներկայացվեն հայ հանդիսատեսին

Երևանում փետրվարի 20-ին Մոսկվա կինոթատրոնում կմեկնարկի Բրիտանական ֆիլմերի 14-րդ փառատոնը: Ինչպես տեղեկացնում է «Արմենպրես»-ը, այս տարի փառատոնի ծրագրում ընդգրկված են «Օսկար» մրցանակին առաջադրված մի քանի ֆիլմեր: Փառատոնի բացումը կմեկնարկի «Լեդին ֆուրգոնում՚ ֆիլմով:

Փառատոնի շրջանակներում մայրաքաղաքում և մարզերում կցուցադրվի յոթ ֆիլմ: Երևանում դրանք կցուցադրվեն փետրվարի 20-ից 26-ը Մոսկվա կինոթատրոնում` օրական երեք անգամ:

«Բրիտանական ֆիլմերի փառատոնը հրաշալի հնարավորություն է` ներկայացնելու բրիտանական ֆիլմարտադրության լավագույն նմուշները: Մշակույթը լավ հարթակ է այնպիսի երևույթների մասին տեսակետների փոխանակման համար, ինչպիսիք են մարդու իրավունքները,արդարադատությունը և բազմազանությունը»,- նշեց Միացյան Թագավորության դեսպան Ջուդիթ Ֆարնուորթը: Նրա կարծիքով, առաջարկվող ֆիլմերն իսկապես լավն են և կարժանանան հայ հանդիսատեսի հավանությանը:

«Այս տարի ֆիլմերը պատմում են սիրո, սեփական իրավունքների, արդարության և իրենց երազանքների համար պայքարող մարդկանց մասին: Փառատոնի ծրագիրը բազմազան է թե՜ թեմաների ընտրությամբ, և թե՜ ֆիլմերի ժանրային առանձնահատկությամբ»,-ասաց Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը:

Հայաստանում Beeline-ի Գլխավոր տնօրեն Անդրեյ Պյատախինի խոսքով՝  որպես կանոն, փառատոնը մեծ համբավ է վայելում երիտասարդների շրջանում, իսկ որակյալ ֆիլմերը ոգեշնչում են երիտասարդներին` նոր բարձունքներ նվաճելու հարցում: «Ուրախ ենք նաև, որ բրիտանական ֆիլմերի ցուցադրության ցանկում ընդգրկվել են նոր մարզեր»,- նշեց նա:

Փառատոնն այս տարի կընդգրկի Ապարան, Դիլիջան, Ալավերդի քաղաքները: Մուտքն ազատ է բոլոր ֆիլմերի համար: