Սիթիներում հնդիկներ են հայտնվել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Հրապարակին» վերջին շրջանում ահազանգում են «Երեւան Սիթիի» արդեն նախկին աշխատակիցներ եւ բողոքում սուպերմարկետի վարած քաղաքականությունից: Նշում են, որ սուպերմարկետների ցանցը սկսել է ազատվել հայազգի աշխատակիցներից՝ նրանց փոխարեն ընդունելով հնդիկների, որոնց ավելի քիչ են վարձատրում: Հայ աշխատակիցներին ուղիղ տեքստով ասում են, որ ազատված են աշխատանքից` իրենց փոխարեն հնդիկներն են աշխատելու։ «Սիթիների» նախկին աշխատակիցները նշում են, որ հիմնականում աշխատանքը կորցնում են մաքրուհիները, պահեստներում բանվորություն անողները` սեւ աշխատուժը։

Մենք փորձեցինք «Երեւան Սիթիի» գլխավոր գրասենյակից ճշտել, թե սա որքանով է համապատասխանում իրականությանը` քանի հնդիկ աշխատակից ունեն այս պահին «Երեւան Սիթիում», եւ արդյո՞ք ցանցը նման քաղաքականություն է վարում: Մեր հարցերին պատասխանեց գրասենյակի իրավաբանական բաժնի աշխատակից Տիգրան Մելքոնյանը. «Նման քաղաքականություն չի վարում ընկերությունը, ես կարող եմ ասել ավելին՝ այս պահին «Սիթի» ՍՊԸ-ում 200-ից ավելի թափուր ազատ տեղեր կան՝ տարբեր հաստիքների համար, որոնք երկար ժամանակ է` չեն համալրվում։

Այն, ինչ Դուք ասացիք, ինձ մոտ զարմանք առաջացրեց, աբսուրդային է, որ մենք հայ աշխատակցին ազատենք եւ նրա տեղն ազգությամբ հնդիկ աշխատակցի վերցնենք, եւ ասածս ապացուցելու համար կարող եմ տարբեր պատճառներ ասել, օրինակ, սուպերմարկետների ցանցից օգտվողների մեծամասնությունը հայեր են, չենք կարող նման քաղաքականություն վարել նաեւ այն պատճառով, որ հաճախորդների մեծ մասը մեր հայրենակիցներն են, եւ հասարակ հաղորդակցման համար էլ խնդիրներ կլինեն, եւ ցանցը չի կարող լիարժեք սպասարկում իրականացնել։

Ասածիս մեջ խնդրում եմ չտեսնեք խտրական վերաբերմունք այլ ազգի ներկայացուցիչների նկատմամբ, պարզապես որպես հիմնավորում եմ բերում»։ Իսկ «Երեւան Սիթիում» ազգությամբ հնդիկ քանի՞ աշխատակից ունեք այս պահին։ ««Սիթիում» կան ազգությամբ հնդիկ աշխատակիցներ, որոնց մեզ մոտ ուղղորդում են աուտսորս կամպանիայից, այլ կազմակերպություն է մեզ ծառայություններ մատուցում, եւ նրանք ազգությամբ հնդիկ աշխատուժի տեսքով են, որոնց մատուցած ծառայությունների համար մենք վճարում ենք այդ կազմակերպությանը, իրենք էլ աշխատավարձ են տալիս իրենց աշխատակիցներին»։