Պետպատվերով «Էկո»-ի ծրագրով այս տարի արդեն 100 երեխա է ծնվել․ Ավանեսյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

2024 թվականին առողջապահության ոլորտին պետբյուջեից կհատկացվի 168 մլրդ դրամ, որը 18,4 տոկոսով ավելի է, քան ընթացիկ տարում էր։ Այսօր Ազգային ժողովում 2024 թ. պետական բյուջեի նախագծի քննարկմանը հայտարարեց ՀՀ առողջապահության նախարար Անահիտ Ավանեսյանը։

Նրա խոսքով՝ 2018 թվականի համեմատ ոլորտին հատկացումները կրկնապատկվել են։

«Սա նշանակում է, որ կառավարությունը հետևողականորեն իրացնում է իր խոստումը՝ պահպանելու և վերականգնելու մեր քաղաքացիների առողջությունը, կանգնել մարդու կողքին, երբ բուժման անհրաժեշտություն կա, փրկել կյանքեր, նպաստել ծնելիության աճին, ապահովել արժանապատիվ խնամք, երբ բուժման հնարավորությունները սպառվել են»,- նշեց Ավանեսյանը։

Նա հավելեց, որ երկրի բյուջեն թվերից ու տոկոսներից զատ նախևառաջ մարդու մասին է և որոշ տվյալներ ներկայացրեց ընթացիկ տարվում ոլորտի ձեռքբերումների մասին։ Մասնավորաբար, վերջին 10 ամիսների ընթացքում անպտղության հաղթահարման պետական ծրագրով 100 բալիկ է ծնվել։

Նախորդ տարվա համեմատ ընդլայնվել է նաև պետպատվերի շրջանակում իրականացվող վիրահատությունների ցանկը։

Ավանեսյանը հիշեցրեց՝ 2024-ից փուլային տարբերակով ներդրվում է առողջության ապահովագրության ծրագիրը։ 2025-ին կընդգրկվեն կենսաթոշակ ստացող քաղաքացիները՝ պետության հոգածության ներքո։ 2027-ին նախատեսվում է, որ ամբողջովին գործարկված և արդեն ներդրված կլինի առողջության համապարփակ ապահովագրության համակարգը։

«Միջին աշխատավարձից ցածր ստացող քաղաքացիների համար ոչ միայն կգործի սուբսիդավորման համակարգ, այլև 50 հազարի շրջանակում քաղաքացուն հետ կվերադարձվեն նրա առողջական ծախսերը»,- ասաց նախարարը։

Անդրադառնալով այն հարցին, թե արդյոք ապահովագրությունն ամեն ինչ փակելու է, Ավանեսյանն ասաց՝ իհարկե, ոչ, սակայն բավականին ընդգրկուն է լինելու։