Որ ասում են՝ վրիպակներ, հայերին քոչվորներ ներկայացնե՞լն է վրիպակ. կրքերը դասագրքի շուրջ չեն հանդարտվում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Համացանցում շարունակ թափ է հավաքում 7-րդ դասարանի համար Սմբատ Հովհաննիսյանի հեղինակած «Հայոց պատմություն» դասագրքի դեմ մեկնարկած ֆլեշմոբը, որին միանում են թե՛ մանկավարժները, թե՛ ծնողները:

Մանկավարժներից շատերը հայտարարում են, որ չեն պատրաստվում դրանով դասավանդել։ 
MediaHub-ը կապ հաստատեց երևանյան դպրոցներից մեկի պատմության ուսուցչի հետ, որը ևս միացել է ֆլեշմոբին, որպեսզի ծանոթանա վերջինիս դիրքորոշման հետ, ինչպես նաև ստանա պատասխաններ գրքի բովանդակության և հետագա որոշումների մասին։ 

«Մենք հրաժարվել ենք տվյալ «դասագրքից»։ Շատ կարճ ժամանակ ենք օգտվել դասագրքից, բայց այդ ժամանակը բավական էր հասկանալու համար, որ պարզապես անհնար է աշխատել այդ բովանդակությամբ, վրիպումներով ու սխալներով լի բացատրություններով դասագրքով, որը նաև խայտառակ աղմկահարույց քարտեզ է պարունակում։ Այնտեղ բազմաթիվ թերություններ կան, 7-րդ դասարանի երեխայի համար գրված է բավականին բարդ լեզվով։ Նախատեսում են պատմությունը սկսել ուսումնասիրել 7-րդ դասարանից, իսկ մինչ այդ, 6-րդ դասարանից սկսած, բավականին լուրջ աշխատանք էր տարվում և հենասյուներ էին դրվում պատմության հետագա ուսումնասիրության համար։ Առկա են բազմաթիվ անհեթեթ բառեր, որոնց բացատրություններն անգամ չի տրվում, իսկ եթե տրվում են, ապա բավականին ոչ մատչելի և բարդ կերպով»,- նշեց մեր զրուցակիցը։ 

Մանկավարժի խոսքով ՝ ամենից զատ, տվյալ դասագիրքը բարդ ընկալելի է, անգամ գերազանց սովորող աշակերտները տվյալ գրքով աշխատելիս բարդությունների առջև են կանգնել։ 

Հաջորդ թերությունը, ըստ մեր զրուցակցի, գրքի կառուցվածքն է, որպես պարագրաֆ առանձնացված բավական բարդ բաժանումներ են կատարված։ Գրքի մեջ հեղինակը գրում է «սփյուռքներ», այն դեպքում, որ այդպիսի տերմին պարզապես գոյություն չունի և ուղղակի ծիծաղելի է նման վրիպակը։ 

«Աղմկահարույց քարտեզը, որը գտնվում է 80 էջում, պարզապես խայտառակություն է, քանի որ քարտեզի վրա բացակայում է Արցախը։ Նշված է ք․ա․ 55թ., Տիգրան Մեծի ժամանակաշրջան և այդ քարտեզի վրա հեղինակը գրում է Թուրքիա և Ադրբեջան՝ այն դեպքում, որ մենք միշտ սերմանել ենք երեխաների մեջ հայկականություն և այն, որ մենք աշխարհի հնագույն ազգերից մեկն ենք, իսկ Ադրբեջանը 100 տարվա պատմություն ունեցող թուրքական պրոեկտ է, որը տվյալ հեղինակը ներկայացնում է Տիգրան Մեծի մասին պարագրաֆում։ Երեխան առաջին հերթին քարտեզն է տեսնում, և տեսողական հիշողության մեջ ես չեմ կարող թույլ տալ, որ պահպանվի այդ քարտեզը։ Հեղինակը, ՀՀ իշխանությունների թուրքական օրակարգը թելադրելով, փորձում է խոչընդոտել ազգային մտածողության զարգացմանը և խեղաթյուրում է ողջ պատմական անցյալը»,- շեշտեց մանկավարժը:

Ապա հավելեց.

«Համացանցում, երբ հանդիպում եմ դասագրքի պաշտպաններին, ովքեր ասում են, թե առկա են ընդամենը մի քանի վրիպակներ, ուզում եմ հարցնել՝ ի՞նչ վրիպակների մասին է խոսքը: Հայերին որպես քոչվորների ներկայացնե՞լն է վրիպակ։ Մենք միշտ ապացուցում ենք, որ Հայկական Լեռնաշխարհում հայերն են ապրել ու դեռ Բաբելոնյան ժամանակաշրջանից հայերն իրենց բնակավայրում են, հեղինակն արթնանում է ու որոշում գրել, որ հայերը քոչվորներ են, երբ իրական քոչվորները թուրքական ցեղերն են եղել տարածաշրջանում»:

Մարիա Զարգարյան