Բոչկեն գլորում են իրար վրա. մահացած արմավիրցի ծննդկանի ամուսինը հանդիպել է բժիշկներին

Արմավիրցի ծննդկան Արաքսյա Դանիելյանի մահվան գործով արդեն հարցաքննվել են նրա հարազատներից մի քանիսն ու բժիշկները: Այս մասին NEWS.am-ի հետ զրույցում ասաց մահացածի ամուսինը` Արցախ Քոչարյանը:

Արցախ Քոչարյանը պատմեց, որ ինքն անձամբ հանդիպել է թերապեւտ Անդրանիկ Պապոյանին, որը զննել է կնոջն ու ասել, որ ոչ մի խնդիր չի տեսնում եւ հերթապահ մանկաբարձ-գինեկոլոգ Բելլա Կարապետյանին:

«Բոչկեն գլորում են իրար վրա: Պապոյանն ասում ա` թոքերը լսել եմ, չի լսվել, ռենտգեն եմ նշանակել, Բելլան չի արել: Ինձ ցույց էլ տվեցին, որ ռենտգեն է նշանակել: Բելլային հարցնում եմ` ինչու չես արել ռենտգեն, ասում ա` մի օրվա մեջ չէի կարող համ ջերմությունն իջացնել, համ  ռենտգեն անել»,- ասաց Արցախ Քոչարյանը:

Հիշեցնենք, որ Արաքսյա Դանիելյանը մահացել է հունվարի 13-ին Երեւանի «Սուրբ Գրիգոր Լուսավորիչ» բժշկական կենտրոնում: Ամուսինը Արաքսյայի մահվան մեջ Արմավիրի բժշկական կենտրոնի բժիշկներին է մեղադրում` ասելով, որ նրանք ժամանակին ռենգտեն հետազոտություն չեն արել, թոքաբորբը ուշ է հայտնաբերվել, այդ պատճառով հնարավոր չի եղել փրկել նրա կյանքը:

«Արմավիր» բժշկական կենտրոնի բժիշկ-թերապեւտը, որը հետազոտել է Արաքսյայի թոքերը, պնդում է, որ մեղադրանքներն անհիմն են, ինքը նշանակել է ռենտգեն հետազոտություն, որը, սակայն, չի արվել:

Արաքսյա Դանիելյանը «Արմավիր» բժշկական կենտրոն է տեղափոխվել դեկտեմբերի 26-ին: 3 օր անց նրա մոտ հայտնաբերվել է թոքաբորբ ու տեղափոխվել է Երեւան: Դեկտեմբերի 31-ին նրան կեսարյան հատում են արել, լույս աշխարհ է եկել նրա երկրորդ զավակը՝ որդին:

Նշենք, որ ըստ առողջապահության նախարարության հաղորդագրության՝ ծննդկանի մոտ լաբորատոր հետազոտությամբ գրիպի Ա տեսակի H1N1 չի հայտնաբերվել:

Հարուցվել է քրեական գործ ՀՀ ՔՕ 130-րդ հոդվածի 2-րդ մասով (բժշկական օգնություն եւ սպասարկում իրականացնողների կողմից մասնագիտական պարտականությունները ոչ պատշաճ կատարելը, որն անզգուշությամբ առաջացրել է բուժվող հիվանդի մահը):