Չերնամորյանը՝ հայերի շրջանում հնարավոր զոհերի և վիրավորների մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իսրայելի վրա պաղեստինյան ուժերի կողմից ռազմական հարձակման արդյունքում զոհերի և վիրավորների մեջ հայեր չկան, չեն վնասվել նաև հայկական հուշակոթողները։ Այս մասին Sputnik Արմենիայի հետ զրույցում ասել է «Նաիրի» Պետախ–Տիկվայի իսրայելահայերի միության նախագահ և «Israelahayer» («Իսրայելի հայերը») պարբերականի հիմնադիր Արտյոմ Չերնամորյանը։

Չերնամորյանը նաև նշել է, որ իրավիճակն Իսրայելում դեռևս շարունակում է մնալ լարված. երկրի ամբողջ հարավային հատվածը դեռևս հրթիռակոծվում է։

«Ճիշտ է` երեկվա հետ համեմատած հրթիռակոծությունների ինտենսիվությունը զգալիորեն նվազել է։ Թել Ավիվի կենտրոնում այս գիշեր համեմատաբար հանգիստ է եղել, մի փոքր շունչ քաշեցինք, քանի որ իսրայելական բանակն անմիջապես անցավ հարձակման. գիշերը կարգուկանոնն արդեն վերականգնվել էր, թեև ռազմական էսկալացիայի վտանգը շարունակում է մնալ բարձր»,– նկարագրել է նա լրատվամիջոցի հետ զրույցում։

Նրա խոսքով` երկրի հարավում, որտեղ շարունակվում են ռազմական ակտիվ գործողությունները, հայ համայնքը եկեղեցիներ կամ հուշակոթողներ չունի, հիմնական մասը Երուսաղեմում են և, բարեբախտաբար, դրանք չեն խոցվել։

«Մոտ 3000 հատ հրթիռ է ընկել մի պետության վրա, որը շատ ավելի փոքր է ՀՀ–ից, սակայն շատ ավելի խիտ է բնակեցված` մոտ 9 մլն մարդ է ապրում 2 անգամ փոքր այս տարածքում։ Ո՞ւր պիտի կարողանային փախչել մարդիկ, որ կարողանային այդ հրթիռներից պատսպարվել»,– նկատել է Արտյոմ Չերնամորյանը։

Նրա տվյաներով` Իսրայելի հարավային շրջաններում է ապրում է մոտ 500 հայ, որոնք երկու օր է` ռմբապաստաներից դուրս չեն գալիս, չափազանց ծանր պայմաններում են ապրում։ Երկրի կենտրոնական հատվածներում` Երուսաղեմ, Թել Ավիվ, Պետախ–Տիկվա և այլն, ապրում է մոտ 3000 հայ։