Արցախի նախագահը սարսափած է Ռուբեն Վարդանյանից

Արցախում անցած գիշեր կայացած խորհրդարանի նիստին մասնակցել է մոտ 7 տասնյակ անձինք՝ նախկին ու ներկա նախագահներ, պատգամավորներ, կառավարության անդամներ, կուսակցությունների ղեկավարներ ու հանրային սեկտորի ներկայացուցիչներ, սակայն չի մասնակցել «Արցախի անվտանգության և զարգացման ճակատի» համակարգող, նախկին պետնախարար Ռուբեն Վարդանյանը։ Պատճառը, մեր աղբյուրի փոխանցմամբ, Արայիկ Հարությունյանի կտրուկ պահանջն է եղել, թե չի ցանկանում, որ նիստին մասնակցի նախկին պետնախարարը։

Հիշեցնենք, օրեր առաջ հենց Ռուբեն Վարդանյանն էր Արայիկ Հարությունյանին ուղիղ մեղադրել հրաժարականի խոստում տալու, ապա սեփական խոսքից հրաժարվելու, հանրությանն ու քաղաքական դերակատարներին խաբելու մեջ։ Եվ Հարությունյանը պարզապես չի ցանկանում հրապարակավ նայել Ռուբեն Վարդանյանին, լսել նրա նախատինքի խոսքերը։

Ռուբեն Վարդանյանի բացակայությունն Արայիկ Հարությունյանին նաև պետք էր այլ առումով, որպեսզի նիստից անմիջապես հետո իրեն ենթակա մամուլով կեղծ տեղեկություններ տարածի, իբր Արցախում կոնսենսուս է ձևավորվել, որտեղ Ռուբեն Վարդանյանն անելիք չունի։

Ամիսներ շարունակ գրել ենք, որ Արցախի նախագահն Ադրբեջանի իշխանությունների և նրանց հայաստանյան սպասարկու վարչախմբի միջոցով արշավ է իրականացնում նախկին պետնախարարի դեմ, փորձում ազատվել նրա ներկայությունից։ Ուստի և Հարությունյանը փորձել է այդ նպատակին ծառայեցնել նաև Ազգային ժողովի նիստը։

Վարդանյանն, ի դեպ, առանձնապես կարիք չուներ մասնակցել այդ նիստին, որտեղ ընդդիմությունը քարուքանդ է արել Հարությունյանի դիրքորոշումը, պարզ և հստակ մեղադրել Արցախի շահերը դավաճանելու մեջ։ Փոխարենը, Արցախում հանրությունը հրաշալի գիտի, թե ով՝ ով է, և ինչ է իրականում անում Արցախի համար։ 

Անահիտ Խաչիկյան