Ո՞վ է իրականում աշխատում Արցախի դեմ

Արցախի անվտանգության և զարգացման ճակատի համակարգող, նախկին պետնախարար Ռուբեն Վարդանյանը մեկնաբանել է Արցախում ստեղծված իրավիճակը։ «Ազատության» հետ զրույցում նախկին պետնախարարի զրույցից կարելի է հստակ եզրահանգումներ անել, որ նրա ղեկավարած ճակատն ամեն ինչ փորձում է անել Արցախում իրավիճակը հունի մեջ պահելու, արցախցիների կյանքն ավելի հարմար դարձնելու, նրանց անվտանգությունն ապահովելու, մինչդեռ, փոխարենն Արցախի նախագահ Արայիկ Հարությունյանն ամեն ինչ անում է իրավիճակը սրելու համար։

Հիշեցնենք՝ անցած շաբաթ Ռուբեն Վարդանյանի նախկին նախագահների և այլ քաղաքական գործիչների հետ կայացած նեղ հանդիպմանը, Արայիկ Հարությունյանը խոստացել էր, որ հրաժարական է տալու, իսկ արդեն օրեր անց ինքն էր սադրել, այսպես կոչված աշխարհազորի ներխուժումն Ազգային ժողով։ Ռուբեն Վարդանյանը նշում է, թե Արցախի նախագահը պետք է վերջացնի մարդկանց թիրախավորել և իր կարծիքը փոխել ամեն շաբաթ։ Անհնար է այս իրավիճակում պայքարել, համախմբվել, երբ ընտրած նախագահը, որն ի պաշտոնե գերագույն հրամանատարն է, ամեն շաբաթ իր մեջ փոխում է իր կարծիքը, ամեն շաբաթ գնում է հանձնվելուց մինչև պայքարելու, մարդիկ չեն կարողանում հասկանալ և չեն կարողանում հետևել նրան։

Վարդանյանը, որ տեսաուղերձով Արայիկ Հարությունյանին կոչ էր արել տղամարդ գտնվել և կատարել իր խոստումը, նշել է, թե իր կոչն արժեքների մասին է, իր կոչը հետևողականության մասին է, նրա մասին է, որ նախագահը պետք է հասկանա՝ իր խոսքը մեծ դեր է խաղում, իր խոսքը չպահելը, կամ իր խոսքին չհետևելը մեծ դժբախտություն է Արցախի համար։

Ավելին, այս իրավիճակում Ռուբեն Վարդանյանն էլ փաստում է, որ նախագահի հրաժարականը պահանջելը խնդրահարույց է, սակայն հենց Արայիկ Հարությունյանը պետք է հասկանա, որ չի կարելի նման կերպ վարվել Արցախի հետ։ Ընդսմին, այս իրավիճակում՝ Արցախում ստեղծված իրավիճակում հերթական անգամ գալիս ենք այն եզրակացության, որ միայն Ռուբեն Վարդանյանի գլխավորած՝ Արցախի անվտանգության և զարգացման ճակատն է, որ ի վիճակի է ինչ-որ բան փոխելու Արցախում։

Նունե Սարիբեկյան