Կուպյանսկում ծանր մարտեր են․ բնակիչներին տարհանում են

Ի պատասխան երկրի հարավային ուղղությամբ շարունակվող ուկրաինական ուժերի հակահարձակման՝ ռուսական ուժերը հարվածներ են հասցրել Ուկրաինայի հյուսիս-արևելքում գտնվող Կուպյանսկ քաղաքին։ 

Տեղի իշխանություններն ու կամավորները տարհանում են խաղաղ բնակիչներին, հայտնում են ուկրաինական լրատվամիջոցները։

Նշվում է, որ իրավիճակը քաղաքում աստիճանաբար ավելի վտանգավոր է դառնում․ մոտ հինգ կիլոմետր հեռավորության վրա դիրքավորված ռուսական ուժերը գրոհում են Կուպյանսկի վրա՝ նպատակադրվելով գրավել քաղաքը։

Ուկրաինացի զինվորականների խոսքով, քաղաքը ռազմավարական նշանակություն ունի՝ երկաթուղային հանգույց լինելու պատճառով, և առջևում ծանր մարտեր են:

Հիշեցնենք, որ Կուպյանսկը յոթ ամիս ռուսների վերահսկողության տակ էր, սակայն ուկրաինական զինուժը կարողացավ ազատագրել այն անցած տարվա սեպտեմբերին: