Իմ տղեն դիրք լքող չի․ գերեվարվածի մայր

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին


Ադրբեջանի զինված ուժերի կողմից երեկ՝ օգոստոսի 16-ին, գերեվարված վարժական հավաքի մասնակից 40-ամյա Գագիկ Ոսկանյանը Երևանի բնակիչ է, ամուսնացած չէ։ Oragir.News-ն այսօր զրուցել է գերեվարված պահեստազորայինի մոր՝ Աշխեն Ավետիսյանի հետ, վերջինս մանրամասներ է հայտնել կատարվածից։ «Համացանցից իմացանք դեպքի մասին, հետո կարդացինք, որ տղաս վիրավոր է, ոտքին են խփել։ Իմ երեխուն դիրքից են տարել, ոչ թե նա է ինքնակամ լքել դիրքը։ Մեկ ասում են՝ գնացել է զուգարան, այնտեղից են տարել, մեկ ասում են՝ լքել է, բայց իմ երեխուն պոստից են տարել, որովհետև անտերություն է, ո՛չ ղեկավար ունենք, ո՛չ հրամանատար»,- նշեց նա։ Գերեվարված Գագիկի մայրը պատմեց, որ զինկոմիսարիատից թուղթ են ստացել, որ որդին օգոստոսի 3-ին պետք է վարժական հավաքների մեկնի։ «Օգոստոսի 3-ին գնացել է, 5 օր անցավ, եկավ, լողացավ, ասաց՝ մեզ տանում են Ջերմուկ ու գնաց։ Սկզբում գնացել են Արարատ, այնտեղից էլ քշել են Ջերմուկի սարերը, որտեղ լիքը թուրքեր են, նրանք Ջերմուկի բարձունքները գրավել են, իրենց «տունն» է»,- պատմեց տիկին Աշխենը։ Նրան զայրացրել է այն հանգամանը, որ տղան պատրաստակամ մեկնել է հավաքների, սակայն այսօր ՊՆ-ն կատարվածը ներկայացնում է որպես դասալքություն․ «Իմ անունից ասեք, որ իմ տղան դասալիք չէ, իմ տղան դիրք լքող չէ, տղայիս դիրքից են տարել։

Սկզբում գրեցին՝ դիրքը լքել է, հետո փոխեցին՝ իբր անհայտ հանգամանքներում, հետո էլ՝ կարող է դատեն»։ Տիկնոջ խոսքով՝ մինչ այս պահը ոչ մի պաշտոնյա չի այցելել իրենց։ «Իշխանության որևէ ներկայացուցիչ մեզ չի հանդիպել, չի զանգել։ Մենք ենք գնացել այստեղ-այնտեղ, դիմել Կարմիր խաչ, որ գործին ընթացք տան, բայց ասացին՝ արդեն հայց են ներկայացրել։ Սպասում ենք։ Աստված գիտի՝ էլ կտեսնե՞մ երեխուս, կխոսե՞մ հետը»,- ասաց նա։ Հիշեցնենք, որ երեկ ՀՀ ՊՆ-ն հայտնել էր, որ օգոստոսի 16-ին պահեստազորային Գ. Ո.-ն, նախնական տվյալներով, ինքնակամ թողել է մարտական դիրքը: Այդ հաղորդագրությունից քիչ անց ադրբեջանական կողմը հաղորդեց, թե կա գերեվարված հայ անձ:

Ադրբեջանական կողմի հայտարարությունից հետո ՀՀ պաշտպանության նախարարությունը տեսանյութ հրապարակեց, որտեղ երևում է՝ ինչպես են Ադրբեջանի ԶՈՒ մի խումբ զինծառայողներ մոտենում դեռևս չպարզված հանգամանքներում ադրբեջանական կողմում հայտնված պահեստազորային Գ. Ո.-ին, նախ զրուցում նրա հետ, ապա ձերբակալում և մեքենայով տեղափոխում անհայտ ուղղությամբ: Ադրբեջանական լրատվամիջոցներն ավելի ուշ հրապարակեցին գերեվարված տղամարդու լուսանկարն ու տվյալները՝ Գագիկ Աշոտի Ոսկանյան, 1983 թվական։ Նշենք նաև, որ Ադրբեջանի կողմից գերեվարված զինծառայողի համար կառավարությունը դիմել է Եվրոպական դատարան։

Անի Ներկարարյան