Համատեղ աշխատանքը հսկայական էներգիա է տալիս. Ռուբեն Վարդանյան

 «Արցախի անվտանգության և զարգացման ճակատի» համակարգող Ռուբեն Վարդանյանը նշել է, թե հուլիսի 28-ից սկսել են Սուրբ Հակոբավանքի վերականգնումն Արցախում: Վանքի վանահայր Տեր Հովհաննես քահանայի առաջարկած այս նախագիծը համախմբել է ոչ միայն մերձակա գյուղերի, այլ նաև Արցախի տարբեր շրջանների, Մարտակերտի, Ստեփանակերտի բնակիչներին։ «Մի քանի սերունդ է աշխատել միասին՝ սկսած 16-17 տարեկան երիտասարդներից մինչև 83 տարեկան պապիկը: Սկսել ենք մերձակա տարածքը մաքրելուց և վանքի շրջակայքը վերականգնելու աշխատանքներից»,- նշել է Վարդանյանը։

Նախկին պետնախարարը հայտնել է, թե Արցախում մեծ թվով երկարաժամկետ ռազմավարական ծրագրեր են իրականացնում, և դրանք, իհարկե, կարևոր են, բայց այս նախագիծն իր համար առանձնահատուկ նշանակություն ունի։ «Հենց այս դժվարին պահին այն օգնում է պահպանել մեր հոգևոր արժեքները և ամրապնդել այն համոզմունքը, որ չնայած ամեն ինչին՝ մենք ապրելու ենք մեր հողում»,- ասել է Ռուբեն Վարդանյանը։

Նա հայտնել է, թե նախատեսում են այստեղ վերանորոգել դպրոցը, վերակառուցել տները և ստեղծել ապաստարաններ՝ սնունդ պահելու և ռազմական գործողությունների դեպքում երեխաների ու կանանց անվտանգությունն ապահովելու համար: «Համոզված եմ, որ միայն այս կերպ՝ պահպանելով ու վերականգնելով մեր պատմական ժառանգությունը, պատրաստվելով պաշտպանել մեր տները, մեր ընտանիքները, կանանց ու երեխաներին, մենք ամեն ինչ կհաղթահարենք։ Համատեղ աշխատանքը հսկայական էներգիա է տալիս, որը կբավարարի անհնարին թվացող խնդիրների լուծման համար: Պատերազմ, շրջափակում, զրկանքներ՝ այս ամենը կհաղթահարենք միասին՝ օգնելով միմյանց և սահմանելով մեկ ընդհանուր նպատակը»,- նշել է Ռուբեն Վարդանյանը։

Նարինե Սարիբեկյան