Անհնար է խոսել բանակցությունների մասին, երբ կողմերից մեկը շարունակ ատրճանակ է պահում գլխիդ. Ռուբեն Վարդանյան

Բաքու-Ստեփանակերտ բանակցությունները չեն կարող ընթանալ այնպիսի պայմաններում, երբ բանակցային օրակարգն արդեն կանխորոշված է ու սահմանված՝ կողմերից մեկի ցանկությունների հիման վրա։ «Արցախի անվտանգության և զարգացման ճակատի» համակարգող Ռուբեն Վարդանյանն է այդ մասին գրել ֆեյսբուքյան իր էջում՝ նշելով, որ ավելին՝ բանակցային օրակարգը փաստացի հաստատված է Հայաստանի իշխանությունների կողմից: Եվ սա այն դեպքում, որ ոչ մի խոսք չի գնում բանակցությունների համար միջազգային մեխանիզմ ապահովելու կարևորության և անհրաժեշտության մասին:

Ըստ Վարդանյանի՝ Բաքու-Ստեփանակերտ բանակցությունները պետք է ընթանան երրորդ կողմի մասնակցությամբ: «Հայաստանի ղեկավարությունը պետք է փոխի իր դիրքորոշումը և վերադառնա իր պարտավորությունների կատարմանը, որոնք ամրագրված են Հայաստանի Հանրապետության Սահմանադրությամբ: Եվ հենց մենք պետք է ստիպենք նրանց փոխել իրենց մոտեցումն այս հարցում»,- փաստում է Արցախի նախկին պետնախարարը։

Բանակցությունների գնալուց առաջ պետք է ունենալ հստակ արտահայտված դիրքորոշում, օրակարգ, պատրաստված բանակցող թիմ, որ մյուս կողմը հասկանա, որ դու բանակցությունների կողմերից մեկն ես: Անհնար է խոսել բանակցությունների մասին այն պայմաններում, երբ կողմերից մեկը շարունակ ատրճանակ է պահում գլխիդ, իսկ դու շարունակում ես պնդել՝ «Եկեք բանակցենք»։ Այդ դեպքում դու պետք է ասես՝ «Մի կողմ դիր ատրճանակդ, այդ ժամանակ էլ կխոսենք»:

«Մեզ միասնական կամք է պետք: Եթե լինի կամք, կգտնվեն նաև ռեսուրսներ, կոմպետենտ մարդիկ, մեր կողքին կկանգնեն մեծաթիվ դաշնակիցներ, աջակիցներ, մեր ընկերները ողջ աշխարհից: Նայելով մեր հազարամյա պատմությանը՝ կարելի է զարմանալ, թե ինչու ենք մենք այսքան պարզունակ՝ կամ Արևմուտք, կամ Արևելք, կամ Ռուսաստան: Մինչդեռ պետք է աշխատել բոլոր կողմերի հետ, և այդ համագործակցությունն ու դաշնակցային հարաբերություններն առավելագույնս ծառայեցնել սեփական պետության շահերին»,- նշել է «Արցախի անվտանգության և զարգացման ճակատի» համակարգողը։

Արփինե Հասրաթյան