Ինչպես են տղամարդիկ հասկանում, որ մտադիր են ամուսնանալ

Կանանց մշտապես հուզում է մի հարց. երբ է տղամարդը կայացնում այդ ճակատագրական և մեզ համար այդքան կարևոր որոշումը` ամուսնության առաջարկ անել կնոջը: Պարզվում է' դա կատարվում է ակնթարթորեն, պահի ազդեցությամբ։ Հենց այդ պահին են նրանք զգում, որ պատրաստ են ամուսնության և որ նրանց պետք ես հենց դու:

Նա կարող է անակնկալ մատուցել

Երբ ես ու Սառան առաջին անգամ հանդիպեցինք, ես նրան պատմեցի, թե որքան եմ միշտ ցանկացել ունենալ իմ ամենասիրած գրքի`«Մեծն Գեթսբիի» առաջին տպագրության օրինակը: Երկու տարի անց՝ մեր հանդիպման երկամյակի օրը, գնացել էինք ռոմանտիկ ընթրիքի, և նա մեծ անակնկալ մատուցեց ինձ` նվիրելով այն գիրքը, որի մասին այդքան երազում էի: Նա այն գտել էր, գումար էր հավաքել և գնել: Ես ցնցված էի. իրոք, անգամ չէի հիշում, որ նրա հետ խոսել էի այդ գրքի մասին: Սակայն նա, փաստորեն, ոչ միայն լսել է, այլև հիշել է ու իրագործել իմ երազանքը: Դրանից մի քանի ամիս անց ես նրան մի հիանալի ամուսնական մատանի գնեցի...

Սուրեն, 31 տ.

Նա երբեք իմ մեջ մեղավորության զգացում չի առաջացրել

Ես տղաների հետ արշավի գնացի: Ուղևորվեցինք լեռներ: Նախորդ ընկերուհիներս հաստատ պատմություն կսարքեին` իմանալով, որ մի քանի օր շարունակ լինելու եմ տղաների ընկերակցությամբ, առանց վերահսկողության: Սակայն նա շատ հանգիստ ու սիրալիր ասաց. «Լավ ժամանակ կանցկացնես», և անհիմն խանդի ոչ մի նշույլ: Առաջին օրը ես լրիվ անջատվեցի: Երկրորդ օրն արդեն սարսափելի կարոտում էի նրան: Ընկերներիս հետ անցկացրած ամեն րոպեի ընթացքում մտածում էի, թե ինչ լավ կլիներ, եթե նա ինձ հետ այստեղ լիներ: Հետո գնացինք ճաշելու, և ես կրկին սկսեցի մտածել, թե ինչ հաճույքով նա կուտեր այս աղցանը: Այն, որ նա այսպես հանգիստ վերաբերվեց իմ մեկնելու փաստին, առանց իմ մեջ մեղավորության զգացում առաջացնելու, ավելի ամրապնդեց ողջ կյանքս նրա հետ անցկացնելու իմ ցանկությունը:

Էրիկ, 26 տ.

Նա հիանալի հիվանդապահուհի է

Ես Գոհարի հետ հանդիպում էի մոտավորապես մեկ տարի, երբ մայրս լուրջ վիրահատության ենթարկվեց և որոշ ժամանակ չէր կարողանում տեղաշարժվել: Մի օր մայրս զանգահարեց և շնորհակալություն հայտնեց ինձ Գոհարիկի համար: Առանց ինձ տեղյակ պահելու՝ Գոհարն արձակուրդ էր վերցրել և գնացել էր մորս օգնելու տան գործերում: Նա լվացք էր արել, նախաճաշ էր պատրաստել, մաքրել էր տունը: Եվ այդ ամենը` ոչ թե որևէ մեկի խնդրանքով, այլ սեփական նախաձեռնությամբ: Երբ մորս հետ հեռախոսազրույցն ավարտվեց, հասկացա, որ Գոհարը հենց այն աղջիկն է, ում հետ ես ցանկանում եմ ընտանիք կազմել։

Տարոն, 29 տ.

Նա կարողանում է վայելել կյանքը

Մենք հանդիպում էինք շուրջ վեց ամիս, երբ ընկերներս մեզ հրավիրեցին կարաոկե բար: Նրանք սիրում են կատակել, և նրանցից մեկը գաղտնի Անիի համար պատվիրեց Վերկա Սերդյուչկայի երգերից մեկը: Կարծում եմ՝ նրանք ցանկանում էին ստուգել ընկերուհուս հումորի զգացումը: Երբ շոումենը հայտարարեց նրա անունը և ապա երգի անվանումը, որը նա պետք է կատարեր, ես սպասում էի, որ նա հիմա կա՛մ կթաքնվի իմ թիկունքում, կա՛մ բեմ դուրս չի գա, քանի որ բնույթով ամաչկոտ է: Սակայն նա ոչ միայն բեմ բարձրացավ, այլև շատ լավ երգեց: Հենց այդ պահին հասկացա, որ ցանկանում եմ ամուսնանալ նրա հետ: Ամուսնությունը ողջ կյանքի համար է, և ինչ-որ մեկի հետ ամուսնանալիս պետք է վստահ լինես, որ նրա հետ ամբողջ կյանքում հետաքրքիր կլինի ապրել:

Անդրեյ, 33 տ.

Նա երբեք չի կորցնում ինքնատիրապետումը

Ես տանել չեմ կարողանում ճանապարհորդությունները. հատկապես ինձ դուր չեն գալիս օդանավակայանները և այնտեղ տիրող խառնաշփոթը: Անցյալ տարի ես և Էմմին որոշեցինք միասին ճամփորդել: Վայրէջք կատարելուց հետո գնացինք մեր պայուսակները վերցնելու... բայց դրանք չկային: Ես խառնվեցի իրար և մեծ աղմուկ բարձրացրի` վախենալով, որ մեր թանկարժեք հանգստի ընթացքում առանց հագուստի ենք լինելու: Պետք է խոստովանեմ, որ այնքան էլ լավ չպահեցի ինձ օդանավակայանի աշխատակցի հետ, ով փորձում էր ինձ օգնել: Միջամտեց Էմմին. նա ինձ նստեցրեց նստարանին և հանգստացրեց` ասելով, որ ամեն ինչ կանի, որ իրավիճակը շտկի: Ես նստեցի և սկսեցի հետևել, թե ինչպես է նա հանգիստ լուծում տալիս բոլոր հարցերին: Երբ տեսա, թե ինչպես է նա իրեն պահում ծայրահեղ իրավիճակում, հասկացա, որ առանց նրա պարզապես չեմ կարող: Մեր հանգստի վերջին օրը ես նրան ամուսնության առաջարկություն արեցի:

Նարեկ, 28 տ.

Նա միշտ ուշադրության կենտրոնում է

Ալիսան և ես մոտ մեկ տարի էր, ինչ հանդիպում էինք, երբ ես նրան հրավիրեցի մեր կորպորատիվ հավաքույթին: Ես զրուցում էի գործընկերներիս հետ, երբ հանկարծ հայացքս ընկավ նրա վրա. բարի մոտ, մի գավաթ գինի ձեռքին, նա իր շուրջն էր հավաքել իմ գործընկերներից մի քանիսին և ինչ-որ հետաքրքիր պատմություն էր պատմում` թափահարելով ձեռքերն ու բարձր ծիծաղելով: Տեսնելով, թե նրա կենսուրախությունը որքան վարակիչ է նույնիսկ անծանոթ շրջապատի համար՝ հասկացա, որ ցանկանում են նրան միշտ տեսնել կողքիս։

Կարեն, 26 տ.

Նա կարողանում է նախաձեռնող լինել

Երբ հանդիպեցի Կարինեին, արդեն անցյալում երկու լուրջ սիրահարվածություն ունեի, սակայն երբեք ամուսնության մասին չէի մտածել: Նույնիսկ մտածում էի, որ երդվյալ ամուրի եմ: Սակայն մի օր եղբորս հետ դուրս էինք եկել շփվելու, և նա հարցրեց, թե ինչն եմ ամենաշատը գնահատում Կարինեի մեջ: Եվ երբ ես սկսեցի թվարկել նրա այն հատկությունները, որոնք ինձ գրավել են, հասկացա, որ ընդհանուր շատ բան ունենք: Նա ամեն ինչ անում է իր սիրած մարդկանց հաճույք պատճառելու համար: Նախկին հարաբերություններում, որպես կանոն, ես էի նախաձեռնություն ցուցաբերում: Սակայն Կարինեի դեպքում այդ ամենը փոխադարձ էր: Նրա ուշադրությունն ու հոգատարությունն ինձ համար մեծ կարևորություն ունեն:

Հակոբ, 35 տ.

Նա տարբերվում է ամբոխից

Ես առանձնապես նորաձևությանը չեմ հետևում. այնքան էլ տեղյակ չեմ` ինչն է համարվում նորաձև կամ ինչ է պետք կրել: Սակայն միշտ նկատում եմ, երբ կինը գեղեցիկ հագուստով է: Երբ ընկերուհուս`Հասմիկի հետ գնացինք նրա ընկերների կազմակերպած հավաքույթին, նրա տեսքը պարզապես ցնցող էր: Ես հասկացա, որ ցանկանում եմ ամուսնանալ նրա հետ, երբ տեսա, թե ինչ հիասքանչ է նա իր վառ վարդագույն զգեստով և յուրահատուկ զարդով: Մյուսների հագին ձանձրալի սև զգեստներ էին, իսկ նա առանձնանում էր բոլորից: Ես վերջնականապես գիտակցեցի, որ նա յուրօրինակ անձնավորություն է, որի հետ հետաքրքիր կլինի ողջ կյանքում։

Դավիթ, 29 տ.

Նա տիրապետում է վիճելու արվեստին

Որպես կանոն, ես տանել չեմ կարողանում վիճաբանությունները, սակայն չեմ էլ պատրաստվում հանձնվել, եթե վստահ եմ, որ ճիշտ եմ: Երբ ընկերուհուս` Գայանեի հետ առաջին անգամ լուրջ վիճեցինք, ես հասկացա, որ ուզում եմ ամուսնանալ նրա հետ: Մենք սկսեցինք տաքանալ, բղավել միմյանց վրա, մեկս մյուսին չէր լսում. լրիվ կորցրել էինք ինքնատիրապետումը: Հետո հանկարծ Գայանեն կանգ առավ: Նա հանգիստ ինձ բացատրեց, որ կռվելով ոչնչի չենք հասնի և որ պետք է նստել ու քննարկել իրավիճակը: Նախ՝ նա ստիպեց, որ պատմեմ, թե ինչն է ինձ անհանգստացնում, այնուհետև՝ պատմեց իր մտահոգությունները: Արդյունքում՝ ես հասկացա, որ վեճը լուծելու ամենալավ տարբերակը խնդիրը քննարկելն է, այլ ոչ թե գոռգոռալը: Սա ինձ զինաթափեց։

Դանիել, 27 տ.

Չկայացած առաջարկներ

Երբ նա որոշում է առաջարկություն անել, սկսում է մտածել` ինչպես կարող է դա ավելի գեղեցիկ մատուցել: Այս երիտասարդները նույնպես այդպիսի մտադրություն են ունեցել, և ահա թե ինչ է ստացվել: