«Մենք կարող ենք: Ես կարող եմ». Հայաստանում նշում են Քաղցկեղի դեմ պայքարի համաշխարհային օրը (լուսանկար)

Հայաստանում ոչ մի հիվանդ եւ ոչ մի ընտանիք չպետք է մենակ մնա քաղցկեղային հիվանդությանը դեմ առ դեմ, առանց հասարակության եւ մասնագետների աջակցության: Նման կարծիք է հայտնել Հայաստանի առողջապահության նախարար Արմեն Մուրադյանը` ելույթ ունենալով Երեւանում Քաղցկեղի դեմ պայքարի համաշխարհային օրվա պատվին կազմակերպված միջոցառմանը: 

«Մենք բոլորս գիտենք, թե ինչ դժվար է լինում հիվանդի ընտանիքի համար, եթե նա մենակ է մնում այդ հիվանդության դեմ: Ոչ մի հիվանդ, ոչ մի ընտանիք չպետք է մենակ մնա իր հիվանդության դեմ, զրկված հասարակության եւ մասնագետների աջակցությունից», - նշել է նախարարը` հավելելով, որ քաղցկեղային հիվանդությունների բուժմամբ զբաղվող բժիշկները սովորաբար իրենց չեն անջատում հիվանդներից. նրանք միավորում են ուժերը` այդ դժվար փորձությունն անցնելու եւ հիվանդությունը հաղթահարելու համար: 

2016-2018 թվականների Քաղցկեղի դեմ պայքարի համաշխարհային օրվա թեման է` «Մենք կարող ենք: Ես կարող եմ»: Այդ նշանաբանի տակ է անցել այն միջոցառումը, որը կազմակերպվել էր Հայաստանի Ուռուցքաբանության ազգային կենտրոնում Ուռուցքահոգեբանների հայկական ասոցիացիայի մասնակցությամբ: Կենտրոնի տնօրեն Արմեն Թանանյանը նշել է, որ այդ նշանաբանը մատնանշում է նաեւ այն, որ հասարակությունը, հիվանդը եւ բժիշկը պիտի միավորվեն քաղցկեղի դեմ պայքարում:

Ինչպես NEWS.am Medicine-ի թղթակցի հետ զրույցում նշել է հայ ուռուցքահոգեբանների ասոցիացիայի հիմնադիրներից մեկը` հոգեբան Դավիթ Գեւորգյանը, միջոցառման նպատակը  ոչ միայն քաղցկեղի, այլեւ  այդ ախտորոշման  հոգեբանական բաղադրիչի  եւ հիվանդի հոգեբանական վիճակի բարելավման մասին է, չէ՞ որ հիվանդի տրամադրվածությունը կարող է մեծ ազդեցություն ունենալ նրա բուժման ընթացքի վրա: 

«Այդ ախտորոշումն ազդում է հիվանդի հոգեբանական վիճակի վրա, իսկ հոգեբանական վիճակն իր հերթին ազդում է հիվանդության ընթացքի եւ բուժման հաջողության վրա», - նշել է մասնագետը:

Միջոցառման համար ոչ այնքան ստանդարտ ձեւաչափ էր ընտրվել. զեկույցների եւ դասախոսությունների փոխարեն, միջոցառման մասնակիցներին առաջարկեցին դասական երաժշտություն լսել, որն ինքնին կարող է սթրեսի դեմ պայքարի հիանալի միջոց համարվել: 

Հայ հայտնի կոմպոզիտոր Էդգար Գյանջումյանը հանդես եկավ «Հավատա եւ աղոթիր» երգով, որն ինքը, ինչպես պատմեց NEWS.am Medicine-ի թղթակցի հետ զրույցում, գրել է 10 տարի առաջ, երբ «աստծու օգնությամբ հաղթահարել էր քաղցկեղը»: Գյանջումյանն իրեն երգիչ չի համարում, սակայն բոլոր ներկաներին հուզած երգը որոշել էր անձամբ կատարել: 

Արամ Խաչատրյանի անվան տրիոն միջոցառման մասնակիցների համար նվագեց Արամ Խաչատրյանի, Կոմիտասի եւ մի քանի այլ կոմպոզիտորի ստեղծագործություններ:

NEWS.am Medicine