Թուրքիան մտադիր է պահանջել Իրանից իջեցնել գազի գինը

Թուրքիայի էներգետիկայի եւ բնական պաշարների նախարար Բերաթ Ալբայրաքը հայտարարել է, որ Միջազգային իրավարար դատարանի որոշմանը համապատասխան Անկարան Իրանից պահանջելու է նվազեցնել Թուրքիային վաճառվող գազի գինը:

Այս մասին, ինչպես հաղորդում է «Արմենպրես»-ը, հայտնում է «Անատոլու» լրատվական գործակալությունը:

«Այդ ինչպես է, որ Ռուսաստանից գնվող գազի յուրաքանաչյուր հազար խոր.մ-ի համար Թուրքիան 425 դոլար է վճարում, իսկ Իրանից գնած գազի համար` 490 դոլար: Այդ պատճառով էլ Միջազգային իրավարար դատարանի որոշումից հետո մենք պետք է քննարկենք գազի գնի նվազեցման հարցը», -ասել է նա:

Այն հարցին, թե եթե իրանական կողմը չհամաձայնվի իջեցնել գազի գինը, ինչ՞ քայլ կկատարի Թուրքիան, Ալբայրաքն ասել է, որ այդ ժամանակ գինը կորոշի Իրավարար դատարանը, եւ Իրանը ստիպված կլինի կատարել այդ որոշումը:

Թուրքիան Միջազգային արբիտրաժային դատարանում շահել էր Իրանի դեմ դատը` 2011-2015 թվականներին մատակարարված իրանական գազի համար 10-15 տոկոս զեղչի պահանջ դնելով` Թեհրանին պարտադրելով գազի բարձր գնի դիմաց 1 մլրդ դոլարի փոխհատուցում տրամադրել Թուրքիային, որը Իրանից գնում է միջինը տարեկան 10 մլրդ խոր.մ գազ:

Թուրքիան Իրանից հիմնականում ներկրում է գազ եւ նավթ: Վերջին տարիներին Անկարան պաշտոնական մակարդակով բազմիցս դժգոհել է, որ Իրանը Թուրքիային բավականին թանկ գնով է գազ վաճառում` 1000 խոր.մ-ի դիմաց 490 դոլար, եւ սա այն դեպքում, երբ Թուրքիան Ռուսաստանից գազը գնում է 425, իսկ Ադրբեջանից 335 դոլարով: Իրանի եւ Թուրքայի միջեւ ապրանքաշրջանառության ծավալները 2012 թվականին կազմել են 21,8 մլրդ դոլար, իսկ 2013 թվականին` նվազում է արձանագրվել` հասնելով 13,5 մլրդ-ի: