Հայաստանում բենզինի վաճառքի գինն ադեկվատ է արտերկրից դրա ձեռքբերման գնին. Շաբոյան

ՀՀ կառավարության նիստում տնտեսական մրցակցության պետական հանձնաժողովի նախագահ Արտակ Շաբոյանը հայտարերց, որ Հայաստանում բենզինի վաճառքի գինն ադեկվատ է արտերկրից դրա ձեռքբերման գնին: Ներկայացնելով բենզինի շուկայում իրականացրած ուսումնասիրությունների արդյունքները՝ Ար տակ Շաբոյանը նշեց, որ բենզինի ներկրման և իրացման ոլորտը բարձր կենտրոնացվածություն ունեցող շուկա է, ուստի այս բնագավառը մշտապես ՏՄՊՊՀ-ի տեսադաշտում է, և  իրականացվում են շարունակական ուսումնասիրություններ: «ՀՀ-ում բենզինի գները նախորդ տարի նվազել են՝ 470-ից իջնելով 390 դրամի, եթե դոլարային արտահայատությամբ գնահատենք, ապա բենզինի գները շատ ավելի են նվազել: 2014-ի դրությամբ բենզինի գինը 480-ից նվազել է 390 դրամի, ուստի նշված ժամանակահատվածում բենզինի վաճառքի գները նվազել են 28 տոկոսով, ինչն ադեկվատ է բենզինի ձեռքբերման գներին»,-  «Արմենպրես»-ի հաղորդմամբ՝ ասաց Շաբոյանը:  

Նա նշեց, որ ուսումնասիրել են նաև իրավիճակը տարբեր երկրներում, մասնավորապես, Մեծ Բրիտանիայում, Ռումինիայում, Ֆրանսիայում, Չեխիայում նախորդ տարի բենզինի գների նվազել են 7-10 տոկոսով, իսկ 2015-ի ընթացքում եվրոյով արտահայտված բենզինի գները ՀՀ-ում նվազել են 14 տոկոսով:  

Նավթի տեսակարար կշիռը կարևոր նշանակություն ունի բենզինի գնի վրա և այն հիմնականում ՀՀ է ներկրվում ՌԴ-ից: Այս առնչությամբ Շաբոյանը նշեց. «ՌԴ-ում նավթի արդյունահանման ծախսերը մեծ ծավալ են կազմում, հարկերն ունեն տեսակարար մեծ կշիռ, բացի այդ՝ կատարվում են բենզինի ներկրման տրանսպորտային մեծ ծախսեր: Ստացվում է, որ ՀՀ-ում վաճառվող բենզինի գնի մեջ նավթի տեսակարար կշիռը միայն ութ տոկոս է, ինչի փոփոխությունը քիչ ազդեցություն է ունենում բենզինի վաճառքի գնի վրա»:

Միաժամանակ, ՀՀ ՏՄՊՊՀ նախագահն ընդգծեց, որ պարբերաբար ուսումնասիրում են բենզին ներմուծող «Ֆլեշ» և «Սի Փի Էս» ընկերությունների գործունեությունը: Շաբոյանի խոսքով՝ 2008 թվականի համեմատ բենզին ներկրող խոշոր ընկերությունների թիվը հինգից նվազել է երկուսի: ՏՄՊՊՀ նախագահը վստահեցրեց, որ այս շուկայում մրցակցության սահմանափակման երևույթներ չկան, մուտքի խոչընդոտներ նույնպես: Այնուհանդերձ, եթե կլինեն տնտեսավարողներ, որոնք այս ոլորտում կհանդիպեն խոչընդոտների, ապա Շաբոյանը հորդորեց դիմել իրենց, և հանձնաժողովը հետևողական կլինի խնդիրների լուծման հարցում: