Ալիեւին Էրդողանի հետ դժվար բանակցություններ են սպասում

Թուրքիայի նախագահ Ռեջեփ Թայիփ Էրդողանը փետրվարի 18-ին այց կկատարի Ադրբեջան: Այցի մանրամասները դեռեւս ճշտվում են: Էրդողանի այցի ժամանակ պետք է անցկացվի Թուրքիայի հետ Ադրբեջանի միջեւ Բարձր մակարդակի ռազմավարական համագործակցության խորհրդի նիստ:

Ինչպես հաղորդում է «Արմենպրես»-ը, «Ազադլըգ» թերթն ուշադրություն է հրավիրում այն բանի վրա, որ Էրդողանի այցը համընկնում է Թուրքիայի եւ Ռուսաստանի միջեւ հերթական լարվածության ժամանակաշրջանին` կապված Անկարայի կողմից այն պնդման հետ, թե ռուսաստանյան ինքնաթիռն արդեն երկրորդ անգամ խախտել է թուրքական օդային սահմանը, ինչը Մոսկվան կտրականապես հերքում է:

Թերթը գրում է, որ Բաքվում Թուրքիային համարում են Ադրբեջանի       ռազմավարական դաշնակից, Ռուսաստանին` ռազմավարական գործընկեր, իսկ երկու երկրներին` Ադրբեջանի ամենամեծ առեւտրային գործընկերներ:

Նշելով, որ պաշտոնական Բաքուն մինչ այժմ հստակ դիրքորոշում ցույց չի տվել անցյալ տարվա դեկտեմբերից սկսված Մոսկվա-Անկարա լարվածությանը, թերթը գրում է, որ, ամենայն հավանականությամբ, Էրդողանը Բաքու է ժամանում պարզելու այդ հանգամանքը:

Թերթը հարցադրել է, թե Կրեմլի հետ կապված հարաբերություններում որոշ փոփոխություններ մտցնելու Անկարայի հնարավոր պահանջը կարո՞ղ է, արդյոք, դրական պատասխանի արժանանալ Բաքվում:

Ադրբեջանցի քաղաքագետ Հիքմեթ Հաջիզադեն, ըստ թերթի, գտնում է, որ չի բացառվում, որ Էրդողանը Բաքվում բարձրացնի Ռուսաստանի եւ Թուրքիայի միջեւ լարվածության խնդիրը եւ փորձի պարզել Ադրբեջանի դիրքորոշումը:

«Միանշանակ է, որ միեւնույն ժամանակ քննարկան թեմա կհանդիսանան նաեւ Ադրբեջանում խորացող տնտեսական խնդիրների հետ կապված հարցերը: Նույնիսկ չի բացառվում, որ ստեղծված տնտեսական ճգնաժամի հետ կապված Բաքուն ֆինանսական օգնություն խնդրի Թուրքիայից», -ասել է նա:

Նշենք, որ 4 մլրդ դոլար շտապ վարկ ստանալու վերաբերյալ հունվարի 28-ից մինչեւ փետրվարի 3-ը Արժույթի միջազգային հիմնադրամի եւ Համաշխարհային բանկի պատասխանատուների հետ Ադրբեջանի ղեկավարության՝ Բաքվում անցկացրած բանակցություններն անարդյունք են անցել: Ադրբեջանի վարկային վարկանիշը միջազգային վարկանիշային կազմակերպությունների կողմից «աղբային» մակարդակի իջեցվելու պատճառով, ամենայն հավանականությամբ, ապարդյուն  են անցել նաեւ Աբու Դաբիում փետրվարի 2-ին Արաբական Միացյալ Էմիրություններից Ալիեւի օգնություն խնդրելու բանակցությունները: Եվ այժմ, նավթային եկամուտները մոտ երեք անգամ նվազելու պատճառով «ցեյտնոտում» հայտնված Ալիեւը կփորձի փող պարտք վերցնել իր «մեծ եղբորից»: