Պրեմիերայից 35 տարի անց Բրոդվեյում վերջին անգամ ցուցադրվել է լեգենդար «Օպերայի ուրվականը» մյուզիքլը (լուսանկարներ)

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ապրիլի 16-ին լեգենդար «Օպերայի ուրվականը» (Phantom of the Opera) մյուզիքլը 35 տարվա բեմադրություններից հետո վերջին անգամ է ցուցադրվել Բրոդվեյի Majestic թատրոնում։ Այս մասին հայտնում է Associated Press-ը։

Կոմպոզիտոր Էնդրյու Լլոյդ Ուեբերի մյուզիքլը թատրոնում բեմադրվել է 13 981 անգամ՝ դառնալով Բրոդվեյի պատմության մեջ ամենաերկարակյաց ներկայացումը։

Հրաժեշտի ներկայացումն ավարտվել է բուռն ծափահարություններով, շամպայնով, կենացներով և ոսկե կոնֆետիներով։ Բացի այդ, ներկա դերասանական կազմը և նախկին անդամները վերջում կատարեցին «Գիշերվա երաժշտությունը» (The Music of the Night):

Միաժամանակ, պրոդյուսեր Քեմերոն Մակինթոշի խոսքով, մյուզիքլը ապագայում կկարողանա հայտնվել խաղացանկում։

«Ես ավելի քան 55 տարի պրոդյուսեր եմ և տեսել եմ, որ բոլոր հիանալի մյուզիքլները վերադառնում են, և «Օպերայի ուրվականը» մեծագույններից մեկն է: Այնպես որ, դա ժամանակի հարց է»,- ասել է նա։

Բրոդվեյի թատրոնը բեմադրության կփակման մասին հայտարարել էր 2022 թվականի սեպտեմբերին։ Դա բացատրվում էր նրանով, որ ներկայացումը չի կարողացել դիմակայել համավարակի պատճառած կորուստներին։

«Օպերայի ուրվականը» ներկայացման տոմսերը սկսել էին ավելի վատ վաճառվել, և եկամուտներն այլևս չէին ծածկում բեմադրության ծախսերը:

«Օպերայի ուրվականը» առաջին անգամ բեմադրվել է 1986 թվականին՝ Լոնդոնի Ուեսթ Էնդի թատրոններից մեկում։ Այդ ժամանակից ի վեր այն դիտել է ավելի քան 145 միլիոն մարդ՝ 183 քաղաքում: Ներկայացումը թարգմանվել է 17 լեզվով և բեմադրվել ավելի քան 70 000 անգամ։