Առաջին տիկինը մասնակցեց ուսանող ստեղծագործողների աշխատանքների ցուցահանդեսի բացմանը
Հասարակություն
Սուրբ Սարգսի տոնի առթիվ Փ. Թերլեմեզյանի անվան գեղարվեստի պետական քոլեջում բացվեց ուսանող-ստեղծագործողների ցուցահանդես-մրցույթ:
«Աշխատանքները ներկայացրել են մեր բոլոր չորս` գեղանկարչություն, դիզայն, քանդակ և զարդային-կիրառական արվեստ բաժինները: Յուրաքանչյուր ուսանող ներկայացրել է իր ընկալումները` տարբեր տեխնիկաների կիրառմամբ: Մենք փորձում էինք ներկայացնել մեր ավանդույթները, ծիսակարգը` ողջ շքեղությամբ, այնպես, ինչպես պատկերացրել են ուսանողները: Առաջարկը ստացանք Արարատյան Հայրապետական թեմից»,-«Արմենպրես»-ի փոխանցմամբ` նշեց քոլեջի տնօրեն Աննա Մնացականյանը:
Արարատյան Հայրապետական թեմիառաջնորդական փոխանորդ գերաշնորհտեր Նավասարդ արքեպիսկոպոս Կճոյանընշեց, որ նման ցուցահանդեսը պետք է մանրակրկիտ և խորը լռության մեջ դիտել:
«Այս նկարներում կտեսնեք Սուրբ Սարգսի և եկեղեցական այլ խորհրդանիշներ պարունակող պատկերներ: Մաղթում եմ, որ արագահաս Սուրբ Սարգսի բարեխոսությամբ մասնակիցների իղձերն իրականություն դառնան»,-նշեց նա:
Ցուցահանդեսի մասնակիցներ Արմինե Արշակյանը, Անի Պողոսյանը, Գայանե Ավետիսյանը, Աննա Կրճատյանը, Հռիփսիմե Կարապետյանը ճանաչվեցին լավագույնը:
Միջոցառումն իր ներկայությամբ պատվեց ՀՀ առաջին տիկին Ռիտա Սարգսյանը, ով նկարչուհի Արմինե Արշակյանին նվեր հանձնեց:
«Այստեղ մեր երկրի հայտնի նկարիչների ալբոմներն են, և ես ուզում եմ, որ այս վառ գույները, որ տեսա քո նկարներում, ամբողջ կյանքում միշտ լինեն քեզ հետ: Շնորհավոր»,-նշեց Ռիտա Սարգսյանը:
Երիտասարդ նկարիչ Արմինե Արշակյանը խոստովանեց, որ որևէ մրցանակ դեռևս չի ստացել:
«Ես չեմ մտածել, որ հենց Սուրբ Սարգսի թեմայով նկար ստեղծեմ, ուղղակի նկարել եմ: Ընտանիքում արվեստագետներ չունենք. փոքր տարիքից սիրել եմ նկարել, երեք տարի խորացված զբաղվում եմ: Ուզում եմ դառնալ հայտնի նկարիչ»,-նշեց նա:
Սուրբ Սարգսի տոնակատարությունների շրջանակում արդեն երկրորդ անգամ կազմակերպվում է ստեղծագործական բուհերի ուսանողների աշխատանքների ցուցահանդես -մրցույթներ:
Սա այս տարվա առաջին ցուցահանդեսն է: Փ. Թերլեմեզյանի անվան գեղարվեստի պետական քոլեջն առաջին անգամ է միացել տոնին: Բոլոր մասնակիցներն իրենց աշխատանքները ներկայացնելու հնարավորություն կունենան փետրվարի 7-ին Ազատության հրապարակում տեղի ունենալիք Բուն Բարեկենդանի տոնախմբության ժամանակ:
Առաջիկայում կբացվի ևս երեք ցուցահանդես` նվիրված Սուրբ Սարգսի տոնին:
1
2
3
4
5
1
2
3
4
5
1
2
3
4
5
