Հայաստանում առևտրի նվազումը պայմանավորված է տրանսֆերտների ծավալի կրճատմամբ. նախարար

Նախորդ տարեսկզբին համաշխարհային տնտեսության բացասական միտումների պայմաններում Հայաստանը կարողացավ ցույց տալ, որ ի զորու է հաղթահարել տնտեսական անկման վտանգ պարունակող արտաքին բացասական ազդակների ազդեցությունը: «Արմենպրես»-ի փոխանցմամբ` այս մասին լրագրողների հետ ամփոփիչ ասուլիսի ժամանակ հայտարարեց ՀՀ էկոնոմիկայի նախարար Կարեն Ճշմարիտյանը: «Մի կողմից դրական է, որ ունենք տնտեսական ակտիվության աճ, մյուս կողմից` կարող եմ նշել, որ դա բավարար չէ մեզ համար ցանկալի աճն ու արդյունքն ապահովելու համար»,-նկատեց նախարարը` նշելով, որ նախորդ տարի տնտեսական ակտիվության ցուցանիշը կազմել է 103.1 տոկոս: «Տնտեսական ակտիվության ցուցանիշի աճին նպաստել են բոլոր ճյուղերը` բացառությամբ առևտրի ոլորտի: Գյուղատնտեսության աճը կազմել է 11.7 տոկոս, արդյունաբերությունը`5.2 տոկոս, ծառայությունները` 2.7, շինարարությունը երկար դադարից հետո մի փոքր աճ է գրանցել` 0.3 տոկոս&r aquo;,-նշեց էկոնոմիկայի նախարարը:

Կարեն Ճշմարիտյանի խոսքով` 2015-ի հունվար-սեպտեմբերին Հայաստանում գրանցվել է համախառն ներքին արդյունքի 3.5 տոկոս աճ: Բայց, այնուամենայնիվ, բացասական ցուցանիշ է գրանցել առևտուրը, որը նվազել է 8 տոկոսով: «Առևտրի ցուցանիշի նվազումը շարունակում է  հիմնականում պայմանավորված լինել արտաքին մասնավոր տրասնֆերտների ծավալի կրճատմամբ: 2015-ի հունվար-նոյեմբերին նախորդ տարվա համեմատ տրանսֆերտների ծավալը նվազել է 37.2 տոկոսով, ընդ որում` ՌԴ-ից ստացված տրանսֆերտների ծավալը նույն ժամանակահատվածում նվազել է 43.4 տոկոսով»,-հայտնեց Ճշմարիտյանը:

Նախարարը նկատեց, որ ներքին առևտրի շրջանառությունը կազմել է 2 տրիլիոն 282.3 միլիարդ դրամ` նախորդ տարվա համեմատ նվազելով 6.4 տոկոսով: «Կարող ենք փաստել, որ Հայաստանի գործարարները հմուտ աշխատանքի շնորհիվ կարողացել են պահպանել աշխատավարձերը, որը սպառողական շուկայում կարողացել է պահպանել ոչ այդքան մեծ անկում»,-նշեց նախարարը` հավելելով, որ 2015-ին բացվել է առևտրի 1120 նոր օբյեկտ: Առևտրի օբյեկտների թիվը կազմել է 17 հազար 762, որը նախորդ տարվա համեմատ նշանակում է 6.7 տոկոս աճ: