ԿԽՄԿ-ն տեսակցել է 20 տարվա ազատազրկման դատապարտված, Բաքվում պահվող Վիգեն Էուլջեքչյանին. ԶԼՄ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կարմիր խաչի միջազգային կոմիտեի ներկայացուցիչները տեսակցել են Ադրբեջանում պահվող լիբանանահայ Վիգեն Էուլջեքչյանին։ Տեղեկատվությունը Sputnik Արմենիային հայտնել են  ԿԽՄԿ հայաստանյան գրասենյակից։

Հաղորդվում է, որ տեսակցությունը եղել է ապրիլի 3-ին։

«Ապրիլի 3-ին տեղի է ունեցել տեսակցություն առանձնազրույցի ձևաչափով, համաձայն ԿԽՄԿ ընթացակարգերի: Հնարավորություն է տրվել կատարել հեռախոսազանգ ընտանիքին»,– հայտնել են  գրասենյակից։

Հավելենք, որ  Վիգեն Էուլջեքչյանը Բաքվում դատապարտվել է 20 տարվա ազատազրկման:

Սոցցանցերում լուրեր էին տարածվել, որ Բաքվի բանտերից մեկում Վիգենին խոշտանգելով սպանել են։ Դրանից հետո կինը` Լինդա Էուլջեքյանը, բաց նամակ էր գրել` դիմելով ՄԱԿ–ի, Եվրոպական միության, Եվրոպայի խորհրդի, ԵԱՀԿ առաջնորդներին, Ամերիկայի Միացյալ Նահանգների, Ֆրանսիայի, Գերմանիայի նախագահներին, Մեծ Բրիտանիայի վարչապետին և իրավապաշտպան կազմակերպություններին:

Նա խնդրել էր միջազգային իրավապաշտպան կառույցներից և համաշխարհային առաջնորդներից պարզել` արդյոք իր ամուսինը մահացել է, թե ողջ է։ Վիգեն Էուլջեքյանի ընտանիքը նրանից լուր չի ունեցել 2023 թվականի հունվարի 27-ից ի վեր։

Վիգեն Էուլջեքչյանին Ադրբեջանում մեղադրանք է առաջադրվել «վարձկանություն», «ահաբեկչություն», «Ադրբեջանի պետական սահմանի ապօրինի հատում» հոդվածներով:

Մինչդեռ հայտնի է, որ 2015-ին Էուլջեքչյանը ստացել է Հայաստանի քաղաքացիություն, 2019-ին տեղափոխվել է սկզբում Երևան, այնուհետև` Շուշի։ 2020թ. նոյեմբերի 10-ին նրան և Մարալ Նաջարյանին գերի էին վերցրել ադրբեջանցի զինվորականները։