Որևէ կեղտոտ արշավ չի կարող ստվերել Ռուբեն Վարդանյանի աշխատանքն Արցախում

Երբ անցած տարվա նոյեմբերին Արցախ տեղափոխված Ռուբեն Վարդանյանը նշանակվեց պետնախարարի պաշտոնում և պաշտոնավարեց 100 օրից մի փոքր ավելի, տարբեր շրջանակներ Ռուբեն Վարդանյանին մեղադրանքներ էին հասցեագրում, թե իբր նա գնացել է միայն Արցախում իր քաղաքական կապիտալը դիզելու, Հայաստան տեղափոխելու, կամ էլ ինչ-որ այլ նպատակների համար։ Շատերի մտքով չէր անցնում, թե ռուսաստանցի հաջողակ գործարարը պարզապես Արցախ է եկել այն շենացնելու բավական լուրջ ձգտումով։ 

Անցած տարի Արցախում հիմնադրված «Մենք ենք մեր սարեր» գործակալությունը անվտանգության և զարգացման ծրագրեր է մշակում և իրականացնում Արցախի և Սյունիքի համար։ «Արցախ, իմ տեղափոխվելուց հետո գործակալության նպատակներից մեկը պետական-մասնավոր համագործակցության արդյունավետ մոդելի կյանքի կոչումն էր, ես վստահ եմ, որ մեր առջև ծառացած բազմաթիվ խնդիրները՝ հատկապես այս բարդ իրավիճակում, չեն կարող լուծվել միայն պետության միջոցով։ Հենց այդ պատճառով գործակալությունը կարևոր դեր է ունենալու, այդ խնդիրների լուծման հարցում»,- ֆեյսբուքյան իր էջում գրել է Ռուբեն Վարդանյանը։

Գործակալության ստորագրած համագործակցության հուշագրերով միայն անցած շաբաթ շուրջ 260 տոննա սննդամթերք է անհատույց տրամադրվել Արցախի պետական պահուստում ներառելու և բնակչության սոցիալական խմբերին հատկացնելու համար։ Ծրագիրը նախաձեռնվել էր շրջափակման ընթացքում և հնարավոր դարձավ իրականացնել նվիրատուների աջակցությամբ։ Ռուբեն Վարդանյանի նախաձեռնած գործակալությունը 159 նվիրատուներ ունի, որոնք արդեն շուրջ 4 միլիոն դոլարի ծրագրեր են իրականացրել երկու հիմնական ուղղություններով՝ ռազմավարական բնույթի նախաձեռնություններ և հանրային նշանակության ծրագրեր։ Երկրորդ խմբի ծրագրերն ուղղված են եղել շրջափակման մեջ գտնվող Արցախի բնակիչների առաջնահերթ խնդիրների լուծմանը։ 

Ռուբեն Վարդանյանը խոստանում է՝ գործակալությունը շարունակելու է իր ակտիվ գործունեությունը, շուտով կներկայացվեն կարճաժամկետ և երկարաժամկետ նոր ծրագրեր, որոնք վերաբերում են Արցախի առջև կանգնած մի շարք խնդիրների լուծմանը։ Թերևս նույնիսկ պետնախարարի պաշտոնից ազատվելուց հետո այս նախաձեռնությունների առավել ակտիվացումը վկայում է, որ Ռուբեն Վարդանյանի մղումները չափազանց ազնիվ են և որևէ հակաքարոզ ու կեղտոտ տեղեկատվական արշավ չի կարող ստվերել այդ աշխատանքը։ 

Աննա Նադոյան