Ռուբեն Վարդանյանը դարձել է Ադրբեջանի աչքի փուշը
Վերլուծություն
Մյունխենում անվտանգության համաժողովի շրջանակներում կայացած պանելային քննարկմանը, հենց Հայաստանի վարչապետ Նիկոլ Փաշինյանի ներկայությամբ, Ադրբեջանի նախագահը հայտարարել է, թե միայն մեկ նախապայման ունի Արցախի հետ երկխոսություն սկսելու համար։
Ըստ Ալիևի՝ գլխավոր նախապայմանը Արցախից Ռուբեն Վարդանյանի հեռանալն է։ «Մենք պատրաստ ենք գործնական փոխգործակցություն սկսել Ղարաբաղի հայկական համայնքի ներկայացուցիչների հետ, բայց կանենք միայն այն ժամանակ, երբ քրեական օլիգարխը, որը ներգրավված է փողերի լվացման գործարքների մեջ` լքի Արցախի տարածքը»,- ասել է Ալիևը։
«Քրեական հեղինակություն, օլիգարխ» ասելով՝ Ալիևը նկատի ուներ հենց Արցախի պետնախարար Ռուբեն Վարդանյանին, որի նշանակումը պետնախարարի պաշտոնում լուրջ ցնցումներ էր առաջացրել Ադրբեջանում, և մինչ օրս Ադրբեջանի իշխանությունները չեն կարողանում համակերպվել Վարդանյանի պաշտոնավարման հետ։
Ի դեպ, սա առաջին անգամը չէ, որ Ադրբեջանի նախագահը կամ արտգործնախարարը անմիջականորեն տալիս են Ռուբեն Վարդանյանի անունը , դեռ անցած տարվա նոյեմբերին Բաքվում Ալիևը հայտարարում էր, թե Ռուբեն Վարդանյանին ուղարկել են Մոսկվայից՝ հստակ օրակարգով։
Մինչ Ալիևը պնդում է Ռուբեն Վարդանյանին Արցախից հեռացնելու իր պահանջի մասին, նույն այդ քննարկմանը ներկա Նիկոլ Փաշինյանը բառ անգամ չի արտահայտվում և չի նշում, որ արցախցիներն իրենք են որոշելու, թե ով պետք է իրենց անունից բանակցի։ Եվ քանի դեռ Ադրբեջանը շարունակում էիր հակահայ քաղաքականությունը Արցախի պետնախարարն իր ֆեյսբուքյան էջում ամփոփել է իր պաշտոնավարման 100 օրը, նշել, որ դրանք բարդությունների հետ մեկտեղ զարմանալի բացահայտումների շրջան էր , ընդգծել է, որ փորձել է թույլ չտալ ձախողվել ծանրագույն ճգնաժամի պայմաններում, «Սա միասնական պայքարի ու դիմադրության փուլ է բոլորիս համար, այս ամբողջ ընթացքում մենք եղել ու շարունակում ենք մնալ մշտական արտաքին ճնշման և ներքին հակադրության պայմաններում, որոնց սակայն չի հաջողվել խաթարել մեր ծրագրերը»,- ասել է Արցախի պետնախարարը և խոստացել անել ամեն ինչ պատմական այս բարդ փուլը հաղթահարելու համար։
Մարիաննա Սարգսյան
1
2
3
4
5
1
2
3
4
5
1
