Հայաստանում ավելացել են բնակչության բանկային ավանդները

Հայաստանի Հանրապետության բանկային համակարգում 2014-ին բնակչության ավանդներն ավելացել են: «Արմենպրես»-ի փոխանցմամբ՝ ՀՀ Ազգային վիճակագրական ծառայության տվյալներով` 2014-ին ավանդների գումարը կազմել է 894 մլրդ 512 մլն դրամ`  2012-ի 638 մլրդ 348 մլն և 2013-ի 790 մլրդ  227 միլիոն դրամի դիմաց:

Ավանդի միջին չափը 2012 թ. եղել է  414 հազար 243 դրամ,  2013-ին` 433 հազար 476 դրամ, իսկ  2014 թվականին այն նվազել է` կազմելով 408 հազար 662 դրամ: Ավանդի միջին չափը բնակչության մեկ շնչի հաշվով կազմել է՝ 2012 թվականին 210 հազար 892 դրամ,  2013-ին` 261 հազար 890, 2014-ին` 297 հազար 001 դրամ:

Եթե 2012 թվականին Հայաստանի քաղաքացիներն ավանդները ներդրել էին 476 բանկային հաստատություններում` բանկեր և դրանց մասնաճյուղեր, ապա 2013-ին այդ հաստատությունների թիվը հասել է 486-ի, իսկ 2014-ին` 510-ի: 

Բանկերում սպասարկվող ֆիզիկական անձանց թիվը 2012-ին կազմել է 1 մլն 541 հազար, 2013թվականին` 1 մլն 823 հազար, իսկ 2014-ին՝ 2 մլն 188 հազար մարդ: