Գերմանիայում միակ հայ ավտոարշավորդն եմ, կցանկանամ, որ հայերը հետևեն իմ օրինակին․ Աբու Դաբիի 6-ժամյա մրցավազքի TCR դասի հաղթող Արթուր Գորոյանը Հայաստանում էր՝ կիսվելու իր փորձով ու տպավորություններով

Սեղմեք  ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայաստանի ավտոմոբիլային ֆեդերացիան այս տարի առաջին անգամ ներկայացրել է հայ մրցարշավորդ Արթուր Գորոյանին, ով տարին սկսել է կարևոր հաղթանակով։ Նա հաղթանակ է տարել Աբու Դաբիի 6-ժամյա մրցավազքի TCR դասում։ Գերմանական «Շարկի ռեյսինգ» թիմի  հայազգի մրցարշավորդը Հայաստանում էր և հրավիրված մամուլի ասուլիսի ժամանակ, որին ներկա էր նաև Հայաստանի ավտոմոբիլային ֆեդերացիայի նախագահ Արսեն Մանուկյանը, պատմել է իր անցած ուղու, հետագա պլանների և ավտոսպորտի հայաստանյան հեռանկարների մասին։

Արթուր Գորոյանը 10 տարուց ավելի է, ինչ զբաղվում է այս սպորտաձևով և մրցումների մասնակացում է  հիմնականում Գերմանիայում։

Հայ ավտոարշավորդը ծնվել է Ջավախքում, ապրում է ՌԴ-ում, հանդես է գալիս Հայաստանի դրոշի ներքո։ Մարզական կարիերան սկսվել է 2009 թվականին կարտինգում, որի արդյունքում դարձել Է Ռուսաստանի չեմպիոն: Այնուհետև, նա հանդես է եկել GT1, GT2, GT3 մրցումներում։ 2013 թվականին ստացել է C կարգի լիցենզիա, որը նրան թույլ է տվել հանդես գալ առաջին կարգի միջազգային մրցումներում։ Հիմա արդեն Արթուր Գորոյանը B կատեգորիայի միջազգային արտոնագիր ունի։  Գորոյանը թիմակից արշավորդ Ռոմանով Մավլանովի հետ հաղթանակ է տարել հունվարի 21-ին Աբու Դաբիում (ԱՄԷ) կայացած TCR շարքի 6-ժամյա մրցավազքում: Նա 6 վայրկյան շուտ է կարողացել ավարտել հիմնական մրցակից «Wolf – Power Racing»-ի անձնակազմից։

Մարզիկը համոզված է, որ Հայաստանում թեև պաշտոնապես չկան ավտոարշավային մրցումների համար նախատեսված վազքուղիներ, սակայն մեր երկրում միանգամայն հնարավոր է զարգացնել այս ավտոսպորտը։

«Իմ կաևոր նպատակը սպորտի հանրայնացումն է և որպես հայ շատ կցանկանայի սպորտը հանրայնացնել հենց Հայաստանում։ Բայց կարևոր է նաև, որ Հայաստանի մասին լսեն ամբողջ աշխարհում։ Պետք է նշեմ, որ Գերմանիայում ես միակ հայ ավտոարշավորդն եմ, ցուցակներում միշտ գրվում է իմ հայկական ազգանունը, կուզենայի, որ մյուս հայերը ինձնից նույնպես օրինակ վերցնեին և հայկական ներկայացվածություն ունենան իրենց երկրներում»,- ասաց Արթուր Գորոյանը։

Հայ մրցարշավորդը նշեց, որ վերջին մրցավազքը, որ տեղի ունեցավ Աբու Դաբիում և որտեղ նա հաղթանակ տարավ, նույնպես Հայաստանը ճանաչելի դարձնելու նպատակն էր հետապնդում։

«Նպատակը հենց դա էր, որ հայ մարզիկները հանդես գան հայկական արտոնագով ու հայկական դրոշի ներքո»,- ասաց Արթուրը։

Մարզիկը նշեց, որ մտադրություններ ունի նպաստելու Հայաստանում ավտոսպորտի զարգացմանը։ Նա ասաց, որ Հայաստանում կա հնարավորություն, կա ֆեդերացիա, կա կարտինգ։ Երեխաները կարող են զբաղվել կարտինգով, մրցել, սկսել քայլեր ձեռնարկել այդ ուղղությամբ։ Այս մարզաձևում հսկայական ներուժ կա, և հայ արշավորդները կարող են լավ արդյունքների հասնել։

Լրագրողները հետաքրքրվեցին՝ արդյո՞ք մարզիկը մտադրություն չունի տեղափոխվել և բնակություն հաստատել Հայաստանում։

«Գիտեք, մրցույթների բնույթը այնպիսին է, որ ես միշտ տեղից տեղ եմ գնում՝ Գերմանիա, Ֆրանսիա, Իտալիա, բայց ամենուր ելույթ եմ ունենում Հայաստանի դրոշի ներքո և հենց դա է իմ տունը»,- ասաց նա։

Ավտոարշավորդը խոսեց նաև իր մարզական կարիերայում գրանցած լավագույն նվաճան մասին, նշելով, որ դա 2013 թ. Նյուրբուրգրինգում 4 ժամանոց մրցաշարն էր, որտեղ զբաղեցրել է առաջին հորիզոնականը։

«Իսկ եթե հուզական առումով խոսեմ, ապա պետք է նշեմ Աբու Դաբիի մրցաշարը, որտեղ ներկայանում էինք հայ թիմով, հայկական դրոշով, հայ պիլոտներով։ 2013 թ-ի մրցաշարը գերմանական թիմով էր, որտեղ ես միակ հայ պիլոտն էի։ Ինձ բավական հաճախ են հարցնում՝ ինչ է պետք անել այս սպոտով զբաղվելու համար։ Գիտեք, այնպիսի տպավորություն է, որ երիտասարդները շատ չեն փնտրում և փորձում հասկանալ, թե ինչ գոյություն ունի։ Առաջն հերթին կա ավտոսպորտի ֆեդերացիա, ավտոակումբներ, որտեղ կարող են դիմել և սկսել իրենց կարիերան»,- նշեց Արթուրը՝ հույս հայտնելով ապագայում Հայաստանում տեսնել ավտոսպորտի զարգացման համար որակապես լավ պայմաններ։

Հայաստանի ավտոմոբիլային ֆեդերացիայի նախագահ Արսեն Մանուկյանը իր հերթին ընդգծեց, որ այսօր Հայաստանում ավտոսպորտը նոր փուլ է մտնում և նոր հեռանկարներ կարող են բացվել։

«Քանի որ ավտոսպորտի հիմքը կարտինգն է, Հայաստանում սկսվելու են կարտինգի պարապմունքներ  և նախատեսում ենք հանդես գալ Դուբայի 24-ժամյա մրցաձևում,  աշխատելու ենք, որ այստեղ Հայաստանը թիմ ունենա ու Արթուր Գորոյանը ևս իր ներդրումն է ունենալու այդ մրցարշավի մեջ։ Մրցաշարին մասնակցելու են միայն հայկական պիլոտներ։ Մեր երկրում զարգանում է դրիֆտ սպորտաձևը ու այս տարի ունենք 5-6 մրցարշավ»,- ասաց Մանուկյանը։

Խոսելով Հայաստանում ավտոսպարտի զարգացման համար անհրաժեշտ պայմանների մասին, ֆեդերացիայի նախագահն ասաց․

«Մեր երկիրը այսօր գտնվում է ավտոսպորտի զարգացման առումով մի փոքր ցածր մակարդակի վրա, որովհետև չունենք համապատասախան ստանդարտներով մրցուղի։ Ավտոմոբիլային ֆեդերացիան  ջանքեր է գործադրում, որպեսզի Հայասանում կառուցվեն համապատասխան մրցուղիներ, ենթակառուցվածքներ՝ ավտոսպորտի զարգացման համար։ Ֆեդերացիան ծրագիր է  պատրաստում կառավարությանը ներկայացնելու համար։ Ներկա պահին համապատսխան պայմաններ չունենալու պատճառով Վրաստանում ենք իրականացնում պարապմունքները։ Ավտոսպորտի համար համապատասխան վազքուղիները բավականի թանկ արժեն, ներդրումները սկսում են 1մլն դրամից մինչև 50 մլն եվրո։ Հայաստանում «Ֆորմուլա 3-ի» մինիմալ ստանդարտներին համապատասխան վազքուղի ունենալու համար մինիմում 5-6 մլն եվրո է անհրաժեշտ»։