ՀՀ առողջապահության նախարարը կարևորել է դիաբետ ունեցող երեխաների ծրագրով կրթական աշխատանքները

Հանրապետության առաջատար էնդոկրինոլոգների մասնակցությամբ հրավիրված խորհրդակցության ընթացում քննարկվեցին 2015թ. նոյեմբերին մեկնարկած  «Վերահսկի՛ր դիաբետը, ապրի՛ր լիարժեք կյանքով» ծրագրի իրականացման ընթացքը: Քննարկման առանցքում ծրագրի արդյունավետությունը, ձեռքբերումներն  ու  հեռանկարներն էին:

Ինչպես «Արմենպրես»-ին տեղեկացրին ՀՀ առողջապահության նախարարությունից, ՀՀ առողջապահության նախարար Արմեն Մուրադյանն ընդգծել է, որ «Վերահսկի՛ր դիաբետը, ապրի՛ր լիարժեք կյանքով» ծրագիրը կյանքի  է կոչվել   ՀՀ առաջին տիկնոջ անմիջական մասնակցությամբ և հովանավորությամբ: Ծրագրի արդյունավետության բարձրացման տեսնակյունից մեծապես  կարևորվել է կրթական  աշխատանքների իրականացումը` մասնագետների և հիվանդների  անհրաժեշտ գիտելիքներով ապահովումը:

Նախարարի գնահատմամբ` սոցիալական նշանակության այս ծրագրի հիմքում առաջին հերթին շաքարային դիաբետ ունեցող երեխաների կյանքի որակի բարձրացումն է: Արմեն Մուրադյանը կարևորել է բուժաշխատողների կողմից ծրագրի շահառուների հետ  շարունակական իրազեկման աշխատանքի իրականացումը:

ՀՀ ԱՆ գլխավոր մանկական էնդոկրինոլոգ Ելենա Աղաջանովան ներկայացրել է ծրագրի ընթացիկ աշխատանքները, անդրադարձել շաքարային դիաբետով հիվանդների բուժման ռազմավարության մշակման հարցերին։  ՀՀ ԱՆ գլխավոր էնդոկրինոլոգ Էդուարդ Թորոմանյանը  նշել է, որ «Վերահսկի՛ր դիաբետը, ապրի՛ր լիարժեք կյանքով» ծրագրի ներդրումը մեծ առաջընթաց  և լուրջ ձեռքբերում է  Հայաստանի համար, քանի որ  այն ԱՊՀ  ոչ բոլոր   երկրներում է հասանելի:

Դիաբետն ապրելակերպ է, այդ իսկ պատճառով պետությունը ձգտում է հնարավորինս հեշտացնել հիվանդների և առաջին հերթին հիվանդ երեխաների կյանքը։ Հասարակության մեջ բոլոր երեխաները հավասար են, և ՀՀ առողջապահության նախարարությունը փորձում է բարելավել կյանքի հատուկ պայմաններում հայտնված երեխաների բուժման գործընթացը` որդեգրելով ժամանակակից մոտեցումներ: 

2015թ. հուլիսին ՀՀ կառավարության կողմից հավանության արժանացած «Հայաստանի Հանրապետության կարիքների համար ինսուլին լիզպրո 100 ՄՄ/մլ և ինսուլին մարդու իզոֆան (ռեկոմբինանտ) 100 ՄՄ/մլ դեղերի գնման 2015-2019 թվականների գործընթացը կազմակերպելու մասին» ՀՀ կառավարության որոշմամբ առաջիկա 5 տարվա ընթացքում հանրապետությունում իրականացվում է  «Վերահսկի՛ր դիաբետը, ապրի՛ր լիարժեք կյանքով» միջոցառումների ծրագիրը, որի շահառուներն են առաջին տիպի շաքարային դիաբետ ունեցող 0-ից 18 տարեկան երեխաները և 18-ից 22 տարեկան երիտասարդները: 

«Վերահսկի՛ր դիաբետը, ապրի՛ր լիարժեք կյանքով» ծրագրի շրջանակում նախարարությունը ձեռք է բերում ուլտրակարճ ազդեցության ինսուլինի անալոգներ՝ քարտրիջ դեղաձևով, որոնք անվտանգության շնորհիվ, առանց տարիքային սահմանափակումների, լայնորեն կիրառվում են աշխարհում: