20 հազար կոլումբիացիներ, այդ թվում՝ 2 հազար հղի կին Զիկա տենդով է վարակվել

Կոլումբիայում Զիկա տենդով վարակման ավելի քան 20.2 հազար դեպք է արձանագրվել: Հիվանդների շրջանում 2100 հղի կին կա: Այս մասին գրում է ՏԱՍՍ-ի՝ վկայակոչելով երկրի առողջապահության նախարարության տվյալները: Կոլումբիայում ավելի քան 48 մլն մարդ է բնակվում:

Վիրուսը տարածողները Aedes Aegypti մոծակներն են: Հիվանդության ախտանշաններն են բարձր ջերմությունը, դողը, գլխացավերը, մկաններում եւ հոդերում ցավը:

2015 թվականի նոյեմբերի վերջին Բրազիլիայի առողջապահության նախարարությունը զգուշացրել էր, որ հղիության ընթացքում Զիկա վիրուսով վարակվելը կարող է հանգեցնել երեխայի մոտ միկրոցեֆալիայի առաջացման. բնածին արատ, որի արդյունքում գանգի չափը զգալիորեն փոքրանում է՝ հանգեցնելով մտավոր հետամնացության, լսողության եւ տեսողության խանգարման:

Հունվարի 25-ին Առողջապահության համաշխարհային կազմակերպության փորձագետները հայտարարել են, որ վիրուսը կարող է լայնորեն տարածվել Հյուսիսային եւ Հարավային Ամերիկաներում՝ բացառությամբ Կանադայի եւ Չիլիի մայրցամաքային հատվածի: Ներկայում Զիկա տենդի վիրուսը տարածված է արդեն տարածաշրջանի 21 երկրներում:

past.am