«Վարդանյանը երեք տարբերակ է նշել Լեռնային Ղարաբաղի համար»

Forbes.ru-ն գրում է, որ նոյեմբերին չճանաչված Լեռնային Ղարաբաղի Հանրապետության կառավարությունը գլխավորած Ռուբեն Վարդանյանն ասել է, որ տարածաշրջանի ժողովուրդը երեք հնարավոր ապագա ունի՝ «ինտեգրվել Ադրբեջանին, հեռանալ կամ պայքարել»։ «Ես իմ որոշումը կայացրել եմ սեպտեմբերի 2-ին [այն ժամանակ նա հայտարարեց, որ հրաժարվում է ՌԴ քաղաքացիությունից և տեղափոխվում է ԼՂՀ], ես այստեղ եմ, պայքարում եմ, չեմ հեռանա և չեմ ենթարկվի Ադրբեջանի պահանջներին».- հայտարարել է Վարդանյանը:

 «Մենք պետք է ամեն ինչ անենք, որպեսզի հաջորդ սերունդը տեսնի հաղթանակ, անկախ ու երջանիկ Արցախ [այսպես են անվանում չճանաչված Լեռնային Ղարաբաղի Հանրապետությունը Հայաստանում]։ Մենք գիտենք, որ բազմաթիվ սխալներ ու բացթողումներ ենք արել, որ կորցրել ենք մեր ուժը։ Աշխարհը փոխվել է, և մենք այդ դասը քաղել ենք, որպեսզի առաջ ընթանանք»,- ասել է Վարդանյանը ելույթ ունենալով Ստեփանակերտում տեղի ունեցած հանրահավաքում։ Նա խոստացել է իր կապերը, անունն ու ունեցվածքը տալ ի շահ ԼՂՀ-ի։

Ռուբեն Վարդանյանը «Տրոյկա Դիալոգ» ներդրումային ընկերության նախկին ղեկավարն ու հիմնադիրն է, Մոսկվայի «Սկոլկովո» կառավարման դպրոցի առաջին նախագահը։ Forbes-ը Վարդանյանի կարողությունը գնահատել է 1 միլիարդ դոլար 2021 թվականին։ Սեպտեմբերին Վարդանյանը հայտարարել է, որ հրաժարվում է ռուսական անձնագրից և տեղափոխվում Լեռնային Ղարաբաղ։ Դեկտեմբերի 22-ին Վլադիմիր Պուտինը բավարարել է քաղաքացիությունից հրաժարվելու նրա դիմումը։

Forbes-ին տված հարցազրույցում Վարդանյանը նախկինում ասել էր, որ չի նախատեսում պետական ​​պաշտոն զբաղեցնել, սակայն նոյեմբերին ընդունել էր ԼՂՀ նախագահ Արայիկ Հարությունյանի  կառավարության ղեկավարի պաշտոնը զբաղեցնելու առաջարկը։

Կամո Խաչիկյան