Ադրբեջանցի ժողովրդի համբերությունը սպառվելու վրա է. Ալիեւյան կլանը գերադասում է չտեսնել դա

Ադրբեջանցի ժողովրդի համբերության բաժակը լցվել է, եւ դրա վառ ապացույց են սոցցանցերում եւ լրատվամիջոցներում արդբեջանցի օգտատերերի մեկնաբանությունները:

Դրանցից մեկն ակնառու ցույց է տալիս հասարակության զգալի մասի վերաբերմունքն Ալիեւների կլանի նկատմամբ: Այսպես,  minval.az կայքում հրապարակվել է երկրի նախագահ Իլհամ Ալիեւի քննադատական ելույթը ԵԱՀԿ Մինսկի խմբի համանախագահների հասցեին: Ալիեւը Երիտասարդության առաջին համաժողովի  20-ամյակին նվիրված հանդիպումն օգտագործել է ԵԱՀԿ Մինսկի խմբին մեղադրելու հակամարտությունը սառեցնելու փորձերի համար:  «Նրանց ներկայիս գործունեությունը լիովին անիմաստ է», - հայտնել է Ալիեւը:

Ընդարձակ մեղադրանքի մեկնաբանություններն ավելի հետաքրքիր էին: Բոլոր մեկնաբանների ուղղագրությունը, կետադրությունը եւ ոճը պահպանված է: Օգտատեր Ռաֆիկ Մուսաեւը, Ալիեւին դիմելով, հարց է տալիս.  «Ալիեւ, որտեղի՞ց ես մահմեդական դարձել, քո կինը փողոցային կնոջից ավելի վատ է հագնվում: Գողությունը մեղք է. դուք կես Ադրբեջան եք գողացել:  Ստելը մեղք է, դու ամեն քայլափոխի եւ ամեն արարքում ստում ես:  Նվնվում ես, թե ԵԱՀԿ ՄԽ-ն չի օգնում խնդրի լուծմանը: Չէ՞ որ այդ խնդիրը լուծելու համար զենք կա եւ Ադրբեջանի որդիները, բայց չկա երկրի ղեկավար-առաջնորդ, որը կտանի դեպի ռազմական, տնտեսական հաղթանակ:  Դու շեկ առնետի նման ես, իմ ժողովրդին մեկ քրդերով ես վախեցնում, մեկ սիրիական սցենարներով. կորիր, ձրիակեր, թե չէ ամբողջ ընտանիքով ճաղերի հետեւում պատասխան եք տալու գողության համար. մենք` մահմեդականներս, անհամեմատ ավելի մաքուր ու մարդկային ենք քրիստոնյաների առաջ: Բայց դու եւ քո թիմը մեզ ցեխն եք մտցնում: Կորիր Ադրբեջանի բեմից»:

Օգտատեր Պավել Կլինցովը համարում է, որ  «ձուկը գլխից է հոտում»: Օգտատեր Էլդար Թուքշայթովը համարում է, որ  «պետք չէ նորից հին երգը երգել` եթե ոչ նա, ապա ով: Վստահեցնում եմ, արժանին կգտնվի: Պետք է ժողովրդին հնարավորություն տալ գտնելու նման արժանիին, ցավոք, Ադրբեջանում ավտորիտար-կլանային համակարգը դա թույլ չի տալիս, կասկածում եմ, թե իր կամքով թույլ տա»: