Ցրտահարված ոտքերով 4-ամյա աղջկա ծնողները հայտնաբերվել են. նրան և եղբորը մանկատուն չեն հանձնի

Վանաձորում չտաքացվող տնակում ցրտահարված 4-ամյա աղջկան եւ նրա եղբորը չեն հանձնի մանկատուն. նրանց ծնողներին գտել են։

Երեխաներին խնամող տատը հայտնել էր, որ չգիտի, թե որտեղ են նրանց ծնողները, ինչից հետո Վանաձորի քաղաքապետարանը դիմել էր ՀՀ ոստիկանության Լոռու մարզային վարչության Բազումի բաժին՝ խնդրելով գտնել տնակային ավանում բնակվող 4-ամյա աղջնակի ու նրա 5-ամյա եղբոր ծնողներին:

Վանաձորի քաղաքապետարանի խնամակալության ու հոգաբարձության հանձնաժողովից  NEWS.am-ին հայտնեցին, որ հունվարի 26-ին ոստիկանության Բազումի բաժնից ուղարկված գրությամբ տեղեկացվել է, որ երեխաների ծնողները հայտնաբերվել են:

Պարզվել է, որ ներկայումս երեխաների հայրը՝ Գոռը, երկու երեխաների ու մոր հետ բնակվում է միևնույն տնակում: Ինչ վերաբերում է նրանց մորը՝ Ժանետին, վերջինս գտնվում է  Ռուսաստանի Դաշնությունում:

Ըստ հարազատների՝ երեխաների մայրը ևս առաջիկայում կվերադառնա ու կշարունակի բնակվել երեխաների հետ:

Նշենք, որ 2015թ. նոյեմբերին NEWS.am-ն անդրադարձել էր վանաձորցի 4-ամյա աղջնակի պատմությանը, որի ոտքերը ցրտահարվել էին չտաքացվող տնակում, որտեղ նա եղբոր հետ բնակվում է տատիկի խնամքի տակ։

Աղջնակին հիվանդանոցում խնամում էր տատը՝ Մարիետան: Աղջնակի ցրտահարվելու մասին լուրը շատ արագ տարածվեց, շատերը ցանկություն հայտնեցին օգնել ընտանիքին։  Խնդրի մասին տեղեկացան նաև Վանաձորի խնամակալության ու հոգաբարձության հանձնաժողովում, եւ սկսեցին զբաղվել այդ ընտանիքով։

Պարզվեց, որ երեխաների տատը՝ Մարիետա Ամիրյանը, դեռ 2015թ. սկզբին դիմելով խնամակալության հանձնաժողով, մեկ տարով՝ մինչ տարվա  ավարտը  խնամակալության իրավունք է ստացել 5-ամյա տղա թոռնիկի նկատմամբ, իսկ աղջնակի նկատմամբ խնամակալություն չի ձևակերպվել:

 Հանձնաժաղովի անդամները  հարևաններից ու քաղաքի հասարակական կազմակերպություններից մեկից ահազանգեր են ստացել, որ տատը երկու երեխայի միջև խտրական վերաբերմունք է ցուցաբերում, աղջիկ երեխայի նկատմամբ պատշաճ խնամք  չի ցուցաբերում, երեխան սոված է մնում, նրա նկատմամբ բռնություն է կիրառվում:

Հանձնաժողովն ստիպված է եղել դիմել ոստիկանության օգնությանը՝ երեխաների ծնողներին գտնելու համար, որպեսզի որոշվի երեխաների հետագա ճակատագիրը։