Հայաստանը պատրաստ է իրադրությունը զարգացնել՝ մինչև ամբողջ սահմանի երկայնքով ոչ ադրբեջանական, ոչ հայկական օկուպացված տարածքներ չլինեն. Փաշինյան

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

Ադրբեջանն ունի այսպիսի դիրքորոշում, որ 2021 թվականի մայիսից առաջ էլ կան տարածքներ, որոնք օրինակ՝ Հայաստանը «օկուպացրել», է և իրենք կարծում են, որ Հայաստանն էլ իր հերթին պետք է դուրս գա այդ տարածքներից: ԱԺ-Կառավարություն հարցուպատասխանի ժամանակ այս մասին ասաց ՀՀ վարչապետ Նիկոլ Փաշինյանը:

«Այս կապակցությամբ ես նախկինում հրապարակային չեմ խոսել, բայց ես ուզում եմ հիմա ասել մեր դիրքորոշումը: Մենք ասում ենք, շատ լավ, եկեք հասկանանք, որ եթե ինչ-որ տարածքներից ՀՀ-ն պետք է դուրս գա՝ ի՞նչ սահմանով պետք է դուրս գա, որտեղի՞ց որտեղ պետք է գնա: Այսինքն, մենք եթե հասկանանք, ճշգրտենք այդ սահմանը, դա կարող է Հայաստանի համար լինել շատ ընդունելի խոսակցություն: Եթե մենք վերցնում ենք Խորհրդային միության սահմանը, եթե օրինակ Ադրբեջանը ասում է, որ Հայաստանը օրինակ՝ հյուսիս-արևելքում «օկուպացիայի» տակ է պահում Ադրբեջանի որոշ տարածքներ, նշանակում է, որ այդտեղ ինչ-որ տարածքային բաժանում կա, գիծ կա: Ասում ենք, շատ լավ, ցույց տվեք մեզ գիծը, ցույց տվեք քարտեզը և դա կարող է լինել հետաքրքիր: Մենք չենք մերժում դա, որովհետև հենց այդ նույն տարածքներում հայկական 4 գյուղերի տարածքների մեծամասնությունն օկուպացված է: Օրինակ, Տավուշի մարզի Բերքաբեր գյուղի վարելահողերի մոտ 70 տոկոսն օկուպացված է, Պառավաքար գյուղի վարելահողերի մոտ 70 տոկոսն օկուպացված է, օկուպացված է Այգեհովիտ, Վազաշեն գյուղերի վարելահողերը: Մենք ասում ենք՝ ցույց տվեք սահմանի գիծը և ասեք, թե այդ սահմանի ձեր ցույց տված գիծն ինչ իրավական հիմնավորում ունի»,- նշեց նա:

Փաշինյանի խոսքով, այդ դեպքում Հայաստանը պատրաստ է իրադրությունը զարգացնել՝ մինչև ամբողջ սահմանի երկայնքով ոչ ադրբեջանական, ոչ հայկական օկուպացված տարածքներ չլինեն:

«Մենք պատրաստ ենք գնալ այդ լուծումներին և ես այդ պատասխանատվությունը պատրաստ եմ վերցնել ինձ վրա»,- շեշտեց Նիկոլ Փաշինյանը: