Դիմակայություն Բրյուսելի և Մոսկվայի միջեւ՝ հրապարակ դուրս եկած Մոլդովայի համար

News.am-ը գրում է .

Մոլդովայում եվրոպական ուղու կողմնակիցները եւ ռուսամետ  տրամադրություններով քաղաքացիները միավորվել են կոռուպցիոն սկանդալի կենտրոնում հայտնված կառավարության դեմ, գրում է Լուկա Գամբարդելլան  Il Foglio թերթում հրապարակված հոդվածում:

Մոլդովայի մայրաքաղաք Քիշնեւում 1991-ից ի վեր կառավարության քաղաքականության դեմ նման բազմամարդ ցույցեր տեղի չէին ունեցել: Անցյալ տարվա սեպտեմբերին ցուցարարները քաղաքի  կենտրոնում 300 վրան էին տեղադրել բողոքի ակցիաներ անցկացնելու նպատակով: Անցած շաբաթ բողոքները վերականգնվել են նոր ուժով. մինչեւ  15 հազար մարդ` եվրոպական ուղու կողմնակից եւ ռուսամետ տրամադրություններով ցուցարարներ միավորվել են Պավել Ֆիլիպի գլխավորած կառավարության դեմ, որը մեկ տարվա ընթացքում երրորդ վարչապետն է, ասված է հոդվածում, տեղեկացնում է  Inopressa-ն:

Կոռուպցիայի համար մեղադրվող հայտնի քաղաքական գործիչների, այդ թվում նաեւ նախկին վարչապետ Վլադ Ֆիլատի ձերբակալությունը քաղաքական ճգնաժամի պատճառ է դարձել, որը մինչ օրս շարունակվում է: Նոր վարչապետ Ֆիլիպը եւս անցնում է կոռուպցիայի գործով:  Նա Վլադիմիր Պլախոտնյուկի` 2009-ից ի վեր երկրում իշխող եվրոպամետ Դեմոկրատական կուսակցության առաջնորդի աջ ձեռքն է: Պլախոտնյուկի կողմից ճնշման շնորհիվ նրա մերձավոր կողմնակիցը  վարչապետ է նշանակվել: Ֆիլիպի` պաշտոնը ստանձնելու օրը հազարավոր մարդիկ գրոհեցին խորհրդարանը` պատգամավորներին փակելով շենքի ներսում, գրում է թղթակիցը: 

«Դրանից մի քանի ամիս առաջ Եվրոպայի կողմնակիցները եւ ռուսամետ քաղաքացիները առանձին-առանձին ցույց արեցին կառավարության դեմ: Հետո նրանք միավորվեցին», - Il Foglio-ին պատմել է լրագրող Դումիտրու Կիորիկին:  Երկու շարժման ներկայացուցիչները շարունակում են տարբեր նպատակներ հետապնդել.    եվրոպամետները ցանկանում են քաղաքական բեմից հեռացնել Պլախոտնյուկին եւ իր շրջապատին, մինչ ռուսամետ տրամադրվածությամբ քաղաքացիների առաջնահերթությունը շարունակում են մնալ արտահերթ ընտրությունները: Հարցումների տվյալների համաձայն, նրանք կարող են խորհրդարանում մինչեւ   50 տոկոս ձայներ ստանալ: ԵՄ-ն ձգտում է   Ուկրաինային սահմանակից ռազմավարական կարեւորություն ունեցող երկրում  իր ազդեցության կորուստ թույլ չտալ: 

Մոլդովացի լրագրողի խոսքով, եթե 2009-ին բնակչության 60-70 տոկոսը հանդես էր գալիս եվրոպական ուղու օգտին, ապա այսօր ԵՄ-ն ընկալվում է որպես կոռումպացված քաղաքական դասի պաշտպան եւ մոլդովացիների միայն 40 տոկոսն է դեռեւս հանդես գալիս ԵՄ-ին անդամակցության օգտին: Բրյուսելում ակնդետ հետեւում են Մոլդովայում իրավիճակի զարգացմանը: Լիովին ակնհայտ է, որ կառավարությունը պիտի ընդառաջ գնա քաղաքացիների պահանջներին եւ երկրի համար առաջնահերթ հարցեր լուծի, նախ եւ առաջ բարեփոխումների եւ տնտեսության կայունացման հարցը, իսկ ամենակարեւորը` կարգավորի բանկային ճգնաժամը եւ պայքար սկսի կոռուպցիայի դեմ, գրում է թղթակիցը: 

Հեղինակի խոսքով, Մոլդովայում տնտեսական իրավիճակը վատացել է: Միջին աշխատավարձը  220 եվրո է կազմում, 4 միլիոնանոց բնակչությունից մոտ 500 հազար մարդ Ռուսաստանում է աշխատում: Մոլդովան էներգետիկ առումով եւս կախված է Ռուսաստանից. Մոսկվան է ապահովում երկրի գազի պահանջարկի   75 տոկոսը: 2-3 ամսվա ընթացքում վարկի տրամադրման վերաբերյալ համաձայնագիր ստորագրելու նպատակով Մոլդովա է գալու ԱՄՀ-ի պատվիրակությունը:  Հարեւան Ռումինիան Մոլդովային    65 մլն դոլարի փոխառություն կտրամադրի բարեփոխումների իրականացման եւ ԱՄՀ-ի հետ համաձայնագրի ստորագրման պայմանով:  «Այդ պայմանները դժվար իրականանալի են, եթե երկրում ընտրություններ տեղի ունենան եւ դրանցում հաղթեն ռուսամետ կուսակցությունները», - գրում է թղթակիցը: