Մերի Մարգարյանի հայրը պահանջում է կարգապահական վարույթ հարուցել Շուշանիկ Բախշյանի փաստաբանի դեմ

Անցած տարվա ամռանը մահացած ծննդկան Մերի Մարգարյանի հայրը Վաղինակ Մարգարյանը պատրաստվում է երկուշաբթի օրը դիմում ներկայացնել ՀՀ Փաստաբանների պալատ։ NEWS.am-ի թղթակցի հետ զրույցում Վաղինակ Մարգարյանը հայտնեց, որ դիմումը վերաբերում է գործով մեղադրյալ «Շենգավիթ» ԲԿ-ի բժշկուհի Շուշանիկ Բախշյանի փաստաբան Ալեքսանդր Սիրունյանին։ «Պատրաստվում եմ երկուշաբթի փաստաբան Ալեքսանդր Սիրունյանի նկատմամբ կարգապահական վարույթ հարուցելու և պատասխանատվության ենթարկելու դիմում մուտքագրել ՀՀ փաստաբանների պալատ՝ իր իսկ կողմից հրապարակված արտահայտությունների մասով»,- ասաց Վաղինակ Մարգարյանը։

Նշենք, որ հունվարի 29-ին Սիրունյանը միջնորդել է՝ իմանալու համար, թե ով է տուժողի իրավահաջորդը, քանի որ ըստ ԶԼՄ հրապարակումների՝ իրավահաջորդը Մերի Մարգարյանի եղբայրն է, որը բանկերից մեկում պաշտոնատար անձ է եւ այս առումով հասկանալի չէ որպես տուժողի իրավահաջորդի ներկայացուցիչ հանրային պաշտպանի ներգրավվումը։ Հիշեցնենք, որ դեռեւս օգոստոսին էինք գրել, որ տուժողի իրավահաջորդ է Վաղինակ Մարգարյանը։

Բացի դրանից, հրավիրված ասուլիսի ժամանակ Սիրունյանը հայտարարել էր, թե «Եթե մեկը դատվի, Շուշանիկ Բախշյանը չի լինելու», «Հոսպիտալացվեր Մերի Մարգարյանը, մահանալու էր, չհոսպիտալացվեր, մահանալու էր»։

Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015 թվականի հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։ 2015 թվականի հուլիսի 24-ին հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: 2015 թվականի հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» բժշկական կենտրոնում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից 2015 թ. հուլիսի 29-ին Մերի Մարգարյանը մահացել է, իսկ հաջորդ օրը թոքերի եւ գլխուղեղի այտուցից մահացել է նաեւ նրա նորածին դուստրը: Շուշանիկ Բախշյանին մեղադրանք է առաջադրվել՝ ՀՀ քրեական օրենսգրքի 130-րդ հոդվածի 2-րդ մասով: Խափանման միջոց չի ընտրվել: